Malaysia in a kir Chinmi 2 Myanmar cozah nih a tlaih hna

Malaysia in a kir Chinmi 2 Myanmar cozah nih a tlaih hna

UNHCR nih Chinmi hlawt dingin thawng a thanh ruangah Malaysia palik tlaih ttih in Myanmar ram ah a kir Chinmi 2; Salai Van Ceu Thawng, kum 28 le Mai Om Hlu hna cu Yangon Airpot ah Lahwahkah nih an tlaih hna, tiah Chin League for Democracy (CLD) Chairman David Ngaisak nih a ttial.

Taza an cuainak hna upadi hi aamah-khan piak a ngah lomi si caah atutiang an hren peng ko hna. An 2 ningin upadi lei in bawmh kan i zuam hna lio a si.

A rung kirmi dang zong anmah bantukin tlaih nan tong ve sual lai ti phan a um ngaingai.

UNHCR nih Chin ralzaam kongah biachahnak a tuahmi hi a zoh tthan lo ahcun Malaysia le India phan Chinmi lawng si loin ramdang phan Chinmi pawl zong Myanmar an rung tlun tikah tazacuai le thongthlak an tong kho men.

Cucaah, UNHCR nih Chin ralzaam kong biachahnak a tuahmi hi a rannak in zoh tthan in remh seh tiah fak piin forhfial ka duh.

1988 in 2010 tiang Myanmar nawlngeitu hna nih hrem, tazacuai le thah dingin tlerh, porter phorhter le rianhrang ttuanter ruang, le harsat ruang hna ah Chin mino tampi cu innpa ram pawl ah an rak zaam hna.

An cuzat hlan le nulepa zohkhenhnak tangah nuam tein a um ding kumkhua an si lio ah hrem le tlerhnak chungin an zaam i, cheukhat cu lampi ah a thimi zong an um.

Nunnak dih tiang le harnak tampi tuar in an phanhnak ram zongah him lo ngai le nitin eidin kongah harsa ngai in an um lio ah UNHCR nih Myanmar ram ah kir dingin biakhiahnak a tuahpiak hna hi cu harnak fak chinchin a pek hna lawng si loin thongtla dingin a nam hna bantuk a si.

‘UNHCR nih Chin ralzaam pawl a kirter hna ahcun zei bantuk tuksapur dah an tong kho’ timi hi naite i Malaysia phan Chin upa pawl nih ceih chih hna seh tiin ka rak ttial hi si.

Sihni U David Ngaisak
Chairman of Chin League for Democracy (CLD)
13 August 2018 | Yangon

Be the first to comment

Leave a Reply

Your email address will not be published.


*