Malaysia Hluttaw ah Chin Tlangval nih Hitin Bia a Chim

- Advertisement -

Nizaan 8pm in 10pm tiang Malaysia Hluttaw ah refugee hruaitu pawl nih zuamcawhtu party MP pawl an ton hna. Chin refugee le Myanmar refugee aiawh in tlangval James Bawi Thang Bik nih bia a chim.

James Bawi Thang Bik nih, “Malaysia cozah nih refugee caah upadi ṭha tein kan tuahpiak seh ti kan duh caah Hluttaw ah MP pawl kan tonmi hna asi,” tiah The Chin Express ah a chim.

“Atu hi Malaysia um Chinmi lakah UNHCR card/catlap a ngeimi nakin a ngei lomi an tam deuh. A ngei lomi caah sizung piah a har tukmi kong ka chimh hna. MP pawl nih ‘mah cu kan theih bal ṭung lo, zei bantuk minung an si zongah sizung nih cun zohkhenh ding pei asi cu’ tiin an ka leh.

August 24, Nikhatni zingka 8am ah video interview kan tar te lai. Tling tein rak zoh ve te.

“Cun, Malaysia ah phungning tein rianṭuan kan ngah lo caah harnak tampi kan tonmi kong ka chimh hna i rianṭuannak nawl pek dingin ka hal hna.

YB Chan Ming Khai, Chair of All Party Parliamentary Group Malaysia on Refugees Policy (APPGM) and also MP for Alor Seter

“Cun, cozah sianginn kainak nawl a kan pek lo hmanh ah fawi tein private sianginn kai khawhnak lam kan tuahpiak uh ka ti hna.

“Cun, Pu Dr. Mahathir (PH) party nih cozah a tlaih lio ahcun refugee caah zei paoh a fawi deuhnak kong, cozah zong nih refugee cungah dawtnak a ngeih deuhnak kong le atu lio cozah tang ahcun refugee huatnak a tam i kan caah a har deuhnak kong pawl ka chim — Mahathir acozah lio ahcun UNHCR nih Chin refugee hlawt a kan timhmi hmanh CHRO, NGO le media pawl he i bawm in kan let ter khawh cu mu.

“Bia ka chim dih hnu ah, Alor Seter MP Chan Ming Khai nih ‘refugee pawl hi Malaysia ah caan saupi um nan i tim maw?’ tiah aa ka hal.

“Kan i tim lo. Asi khawh ahcun a rannak in ram thumnak lanh zokzok kan duh. Malaysia caah phorhrit si ding le huatmi si ding hi kan duh hrimhrim lo. Malaysia ah um thai aa timmi hohmanh kan um lo. Kan ram a ṭhat ahcun kir hmanh kan duh deuh. Mah nak cun Malaysia cozah nih Myanmar ram ṭhatnak caah Myanmar cozah phih-aa kan pek piak ulaw kan duh deuh tiah ka leh – Malaysia ah refugee an um thai lai ti hi an phang tuk.

“MP pawl nih cun mithmai ṭha ngai an ka pek ko. An lungtling ngai ko tiah ka ruah. Nain, Malay miphun nih cun an biaknak aa khatmi muslim refugee Rohingya le Middle East cu usa an pek deuh hna henta. Kannih caah cun Tuluk le India MP hi an ṭha deuh.

“Atu cu avoi 1nak lawng asi rih caah an mit kem lo dingin bia chim zong cu kaa sum pah rih. Hmailei zongah Hluttaw ah MP pawl he tonnak kan ngei lengmang lai i tampi ka chim ṭhan lengmang te lai. Cun kan harsatnak le kan duhmi pawl cu ca zongin kan ṭial lai i kan pek te hna lai,” tiah a chim.

Hluttaw ah MP pawl a ton khawh hna ning

“Hluttaw ah bia kan va chimmi hi Hluttaw meeting ah asi lo. Cozah nih cun refugee a kan rem lo caah refugee he i ton zong an duh lo. Cozah tlaitu party tel loin zuamcawhtu party MP pawl he lawng Hluttaw chungah meeting kan ngeihmi asi. Nain, cozah (Fimcawnnak Vuanci Zung hruaitu pawl) cu hnulei ah an ṭhu ve ko.

“Kan chimmi pawl an khomh dih hnu ah Malaysia Hluttaw ah upadi serpiak dingin a kan halpiak te lai. Cun, zuamcawhtu party nih cozah tlaih ṭhan dingin an i zuam cuahmah lio asi caah an tlaih khawh ahcun tampi san a tlai te lai.

“Malaysia cozah nih refugee caah upadi kan serpiak seh ti ruahchannak in 2018 ah Malaysia Tuluk nu Lilianne Fan le Malaysia um ramkip refugee bu vialte fonh in Refugee Coalition of Malaysia (RCOM) kan dirh. Keimah nih General Secretary ka ṭuan i Lilianne Fan nih adviser a ṭuan.

“Kan i tinhmi cu Malaysia MP pawl ton peng hna in refugee caah upadi serpiak dingin chim peng ding hi asi. Nain, 2019 ahkhan Refugee Council in Australia nih RM17,000 a kan bawmh i Rohingya lawng an pek hna.

“Cun, Malaysia MP sinah Chin refugee kong bia chimnak caan an rak ka pe lo. Chin refugee kong ka chim khawh lo ahcun zei dah nan sin ka ummi phu tiin ka chuahtak hna.

“Mah hnu cun RCOM cu an rianṭuannak a sinpi lo ngai. General Secretary zong tutiang an ngei ti lo. Atu an ka auh ṭhan i nizaan ah Chin refugee le Myanmar refugee vialte ai awh in MP pawl sinah bia ka chim hi si.

“RCOM ahhin Rohingya, COBEM, Syria, Afghanistan, Iraq, Iran, tbk., zong an i tel ve. Nizaan meeting zong ahcun bia an chim ve hna.

“Rohingya cu Malaysia cungah an i lawmhnak lawng an chim. COBEM in Kaya hruaitu nih meeting thoknak bia a chim i a herhmi cu James nih a chim te lai ati i keimah nih Myanmar refugee dihlak huap in ka chim.

“Syria le Middle East pawl cu UNHCR cungah an lungfahnak lawngte an chim i Malaysia cozah nih upadi a tuahpiak khawh hna ding um lo. UNHCR sinah chim ding deuh asi kan ti lai cu.

“COBEM in Kachin, Rakhine le Shan zong an ra ve nain bia an chim lo. Chin cu keimah lawng ka si,” tiah a chim.

2019 ah Malaysia Hluttaw ah na kal bal cang rua? tiah kan hal.

“Si, kha cu refugee kong asi lo. Malaysia cozah nih university siangngakchia, party member pawl le media pawl kha “Hmailei Hruaitu (Future Leader)” timi tlangtar in Hluttaw ah debate tuah ning tinṭan a pek hna.

“Malaysia media Malaysiakini nih Future Leader na si ve, tintan rak kai ve an ka ti caah ka va kai vemi si. Refugee kong ceih asi lo,” ati.

Malaysia Chinmi sin biacah

“Malaysia um Chin mipi sinah chim ka duhmi cu pawngkam nih rem lo le huat dingin um hrimhrim hlah uh. Zuurit i zohchia in um, buai, kunza khai i lamkam le innkil vialte sen dihlak in chak. Hnawm hlonhnak ah hlonh lo, tbk., Malaysia nih complain lo ding tein um i zuam uh.

“Cun, a herhmi paoh cu hruaitu pawl nih san kan tlaih lo zongah UNHCR siseh Malaysia cozah, NGO le media zong kan si khawh chungin kan ton peng ve hna lai.

“Cun, mipi nih pengtlang ṭanh le CRC, ACR, FRO, ZAM, Dai, tbk., refugee community thleidannak lungput ngei hlah uh. A donghnak ahcun aa khat dihmi kan si ko. Pengtlang caah UNHCR, Malaysia cozah, NGO le media kan tong bal lo. Chinmi dihlak ca pengah rianṭuanmi kan si.

“Fimkhur te le lungrual tein thlacamnak he tei kan rial peng hna ahcun hmailei ah kan duhmi kan ngahte ko lai,” ati.

Follow US

102,147FansLike
53FollowersFollow
731SubscribersSubscribe

Ṭial Tharmi

Malaysia biaceih zung nih kum 5 a fa pate a that tu nu le a tlangval pa thihdan a pek hna

Tuni ah Penang High Court nih kum 5 a fa pate a rak thattu hringtu nu le a tlangval pa cu hri...

Myanmar National Team ah ai tel mi Valte

Valte hi Kalymyo um Falam mi a si. 2010 kum ah Kalaymyo certual ah kan i hmu. Cu...

Thantlang ah bomb a puak

Thantlang khua, No (1) sang i sizung lam ah a ummi U Kyaw Min Htet a umnak inn ah September 20 zaan...

Mintami Nanda Hlaing te inn an lockdown

Kawlram hlan lio mintami minthang Nanda Hlaing te inn cu a tu hi nawl ngeitu nih lockdown an tuah.
- Advertisement -