Liamcia ni 5 chungah COVID-19 zulhphung (SOP) a zul lomi an tamtuk. Dawr luh lai ah min, phone number le taklinh a ṭial lomi minung 941 kan tlaih hna, tiah Runvennak Vuanci Pu Ismail Sabri Yaakob nih tuni ah a thanh.
Malaysia ah Chinmi tampi kan um ve caah tlaih kan tonnak hnga lo i ralrin ngai kan hau. Dawr le rianṭuannak, tbk minung tamnak kan kal fatin kutka hram ah min, phone number le taklinh ṭial hrimhrim a herh. Leng chuah fatin mask hruk ding ti cu chim hau loin theih dih asi cang nain philh hrimhrim lo ding.
Pu Ismail Sabri nih, “Khat le khat hlat piin a um lomi zong an tam tuk. Naih tukin a ummi minung 767 kan tlaih ve hna. Rampumpi ah COVID-19 zawtnak a karh tukmi hi mipi nih nan ruah a herh,” ati.
“Nizaan lawng bakah, SOP (COVID-19 zulhphung) a zul lomi 724 kan tlaih hna. 712 cu tangka dan kan tat cang hna. 12 cu an konglam hlat dingin sakhan/lockup ah kan hren rih hna,” ati.
“Nizaan kan tlaihmi chungah; 227 cu hlat piin um lo ruangah tlaihmi an si, 148 cu dawr luh hlan ah min, phone le taklinh a ṭial lomi an si, 130 cu mask aa hruk lomi, 68 cu MCO a buarmi le 63 cu peng-dang le state-dang kal aa thawhmi an si,” ati.
Peng-dang le state-dang kal an khapmi hi Chinmi chungah a zul lomi kan tamtuk. KL in Puchong, Cheras, Kajang, Seremban, tbk a kalmi kan um lengmang. Lamkhamtu palik he i ton sual ahcun i ngaihchih len zongah santlai te lai lo. Kal lo i zuam cio hna usih.
Pu Ismail Sabri nih, “Dawr chung luh hlan ah min, phone le taklinh ṭial hmasa hi kan ram chung COVID-19 cikcin chahnak caah a biapi tukmi si. Mi cheukhat nih an zulh lomi hi ngaihchia ngai asi. Zul hrimhrim uh,” ati.
“Zawtnak a karh sual ahcun, midang tampi nan chawnh manh hna hlan ah ngandamnak zung nih an pehtlaih khawhnak ding caah tuahmi asi. Mah tikah minung tampi nan chawn hna lai lo i zawtnak karh kham a fawi deuh,” ati.
Mah lio cun, “Ramri ah mawtaw 3 in phungninglo ramdangmi 15 a phormi Malaysia rammi 3 kan tlaih hna. An mawtaw kan chuh hna. Anmah he phungninglo ramdangmi 15 he kan tlaih hna,” ati.
