Malaysia ah Covid-19 zawtnak a karh peng rih caah cozah nih state dang 6 a lockdown (MCO) chap lai.
Sarawak state dah ti lo Malaysia rampumpi lockdown asi cang lai tinak asi.
January 22 thok in Kedah, Perak, Negeri Sembilan, Pahang, Terengganu le Perlis state hna cu February 4 tiang lockdown (MCO) an si lai.
Hmasa ahcun Kedah, Perak, Negeri Sembilan, Pahang, Terengganu le Perlis state pawl cu CMCO (partial lockdown) tuahmi an si.
“Ngandamnak Vuanci Zung nih ruahnak a kan cheuh hnu ah state dang 6 lockdown (MCO) chap dingin bia kan khiah hi a si,” tiah Runvennak Vuanci Ismail Sabri Yaakob nih nizaan ah a thanh.
Atu lio lockdown an tuahmi states; Kuala Lumpur, Selangor, Penang, Putrajaya, Labuan, Melaka, Johor le Sabah ah lockdown suah/lo kong bia an khiak rih lo. Zawtnak a karh ning kan zoh hmasa rih lai an ti.
“Zawtnak a zor deuh ahcun, lockdown (MCO) si ti loin dorh deuh (CMCO) ah kan tthumh te lai,” tiah Yaakob nih a chim.
Nizaan ahkhan Malaysia ah Covid-19 mizaw thar 3,631 an hmuh hna. Nikhat te ah mizaw thar 3,000 leng an hmuh hi a pehpeh in ni 6 si cang.
Zawtnak in a thimi 14 an si i a thimi dihlak 619 an si cang. Zawtnak aa thokka in nihin tiang zawtnak ngei hmuhmi dihlak 165,371 an si cang.
