6.4 C
Hakha
Monday, December 9, 2019
More

    Malaysia cozah nih Ralzaam pawl rianttuannak nawl pek/lo December thla ah bia a khiah lai

    Follow Us

    99,419FansLike
    254SubscribersSubscribe

    Ṭial Tharmi

    - Advertisement -

    Kuala Lumpur — Malaysia cozah nih ralzaam pawl rianṭuannak nawl pek/lo kong cu December thla ah bia a khiah lai, tiah Hlutdaw Niam ah an chim.

    Minung Thazaang Vuanci M. Kulasegaran nih, “ralzaam pawl rianṭuannak nawl pek/lo kong ruatkhangtu kawmaṭi kan dirh hnu December 10 in 15 kar ah biakhiahnak tuah asi te lai ti ka zumh. Biakhiahmi cu Malaysia rammi dihlak sinah thawngthanh asi te lai,” tiah Hlutdaw Niam ah a chim.

    PAS party in Pu Ahmad Tarmizi Sulaiman nih, “ralzaam pawl hi cinthlaknak lo zongah rian an ṭuan cang sikaw, cozah nih kan ram chungah rianṭuannak nawl pek nan tim hna maw?” tiah a hal.

    Vuanci Pu Kulasegaran nih, “keimah pumpak in cun, ralzaam pawl hi rianṭuannak nawl pek awk an si tiah ka ruah. Kanmah party nih cozah kan tlaih hlan zongah ralzaam pawl cu rianṭuannak nawl pek hna dingin ka rak chim lengmang cang,” tiah a leh.

    “Kan ram chungah an um ti kan hngalh cio ko, cucaah ramdang ah rianṭuantu va kawl len cu a herh lopi.

    “Mah ruang cun vuanci zung dang pawl he mah kong hi biaruahnak kan ngei cang, i a rauh hlan ah bia kan khiah lai.

    “Nain min cazin lak kong tu ahcun, UNHCR nih card a pek ko cang hna [cozah retheih a hau lo].

    “Na chim bang, rianṭuan an kal lio ah a caan cun palek nih an tlaih hna. Mah ruangah harnak tampi an tong.

    “Kahin rian an ṭuan ti kan hngalh ko, nain kan ram rianṭuannak upadi nih a kilveng kho hna lo.

    “An nuhrin covo a kilven piak kho hna lo, tahchunnak ah Malaysia rammi pawl cu a tlawmbik mah zat tal cu lahkhah pek hna ding timi upadi a um. Mah upadi nih ralzaam a huap hna lo,” tiah a leh.

    Tu kum June thla tiangah, UNHCR Malaysia cazin ning ah ralzaam le ralzaam-soktu 170,000 leng an um. Tam deuh cu kum 18 in 59 kar pa pawl an si, mah ruang cun rian a ṭuan khomi le cozah sinah nungkhuai (tax) a pe kho ding an si.

    Malaysia cu kum 1951 le 1967 Ralzaam Upadi ah min a thu lomi si caah, ralzaam a cohlang lomi le ralzaam caah upadi a ngei lomi ram asi. Ralzaam pawl cu Malaysia upadi ahcun phungninglo ramdangmi an si dih.

    Cucaah palek nih tlaih, thongthlak le an chuahkehnak ram ah kuat khawh an si.

    Atu lio cozah hruaitu Dr Mahathir party Pakatan nih ni kum thimnak an i cuh lio May thla ahkhan ‘kanmah nih teinak kan hmuh i cozah kan tlaih ahcun 1951 Ralzaam Upadi kan cohlan lai i ral-raam in a zaammi ralzaam pawl hi ṭha tein kan bawmh hna lai…” tiah zapi sinah thawng a rak thanh.

    Nawlnak: Kan website chung ca hi website dangah copy piak lo dingin kan in nawl hna.
    Hniang Zi
    Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.