Nirukni ahkhan Malaysia cozah nih Kuala Lumpur khuapi pawnghrawngah phungninglo ramdangmi tlaihkhihnak a tuah i Kawlrammi 15 telhin ramdangmi 102 a tlaih hna.
“Tlaihkhihnak cu zaanlei sml 4 in kan thok i Taman Desa Petaling, Kotaraya Complex, Taman Miharja, Jalan Alor le Bukit Jalil ah tlaihkhihnak kan tuah,” tiah Kuala Lumpur khua palek bawi Datuk Seri Mazlan Lazim nih a chim.
“Kan tlaihmi pawl cu Bangladesh (35), Myanmar (15), Indonesia (26), India (3), Pakistan (6), Nepal (13), Syria (3) le Nigeria (1) hna an si.”
“Anmah pawl cu Malaysia ram ah phungninglo in an um, an passport nithla a thih hnu tiang an um, visit visa in an ra i rian an ttuan. Cucaah, Lahwahkah Upadi 1959/63 Dal 6 (1) (c) in taza kan cuai hna lai.”
“Cun, Kuala Lumpur khua chung i innsaknak hmun ah tangka thap in game aa celhmi Malaysia rammi 2 le Bangladesh rammi 4 zong kan tlaih chap hna.”
“Game celhnak thilri le tangka RM2,118 zong kan chuh hna. Tlaihmi dihlak cu Jinjang Central Lockup ah kan kuat hna.”
“Kan ram chungah phungninglo ramdangmi le sualnak a zornak hnga nifatin tlaihkhihnak kan tuah peng ko lai.”
“Nan pawngkam ah phungninglo ramdangmi an um ti nan theih ahcun Kuala Lumpur Police Hotline 03-2146 9999 silole lam neihbik palek sakhan ah thawngthanh khawh a si,” tiah Mazlan nih a chimchap. – Bernama
