Malaysia ram ah April 10 ah Covid-19 a ngeimi minung 118 an hmuhchap hna i ram pumpi ah Covid-19 zawtnak ngeimi 4,346 an si cang.
April 10 ah minung 3 an thi chap i, a thimi dihlak minung 70 an si cang.
Atu hi Malaysia cu Covid-19 mizaw thar hmuhmi nak in a dammi an tam deuhnak ni 3 a si cang.
Malaysia Ngandamnak Vuanci Zung director-general Datuk Dr Noor Hisham Abdullah nih “April 10 ah Covid -19 in a dammi minung 222 an si i sizung in an ttin cang,” tiah April 10 chun ah thawng a thanh.
Malaysia ram pumpi ah Covid-19 zawtnak aa thok ka in April 10 tiang zawtnak in a dammi dihlak minung 1,830 an si cang.
Atu lio mizaw zual zohkhenhnak khan (ICU) ah a ummi hi mizaw 69 an si.
April 10 ah a thimi mizaw 3 cu; kum 62 simi Malaysia pa a si, zunthlum zawtnak a ngeimi a si. Muslim biakinn aa pummi sin in zawtnak aa chawnmi a si.
A dang 1 cu kum 77 pa a si i zunthlum zawtnak a ngeimi a si. Cun, a pathumnak a thimi cu kum 88 nu a si i, thikai le thluak lei zawtnak a ngeimi a si.
Malaysia ram hruaitu Prime Minister Pu Yassin nih, “Covid-19 zawtnak karh hlah seh tiin lengchuah kan phihmi cu April 28 tiang kan sauh,” tiah April 10 zaanlei ah thawng a thanh.
