Malaysia ram cu COVID-19 zawtnak a karh tuk ṭhan i ni fatin mizaw a thongthong an hmuh peng hna caah tuni ah Selangor state, Petaling peng um sianginn 19 an khar hna.
Sianginn thianh le rungrul thahnak sii kah dih kan duh, cun mizaw he aa naihniammi pawl tlaih in adang tein chiah kan duh hna caah si, tiah Fimcawnnak Zung nih a thanh.
Zawtnak a karh chinnak hnga lo, Petaling peng (district) um sianginn 19 cu zeitik tiang ti um loin kan khar hna, tiah tuni nih Petaling District Fimcawnnak Zung nih cathanh a chuah i siangngakchia le nulepa an phawt hna.
Zei tik dah sianginn kan on ṭhan te lai ti cu thil sining hoih in hnu ah thawng kan thanh ṭhan te lai, ati.
Chinmi ralrin kan herh
Selangor state cu Malaysia ah minung tambiknak asi bang, Chinmi zong tam taktak kan umnak asi.
Petaling district ahcun Chinmi tam taktak kan umnak Puchong, Subang Jaya, Petaling Jaya, Sungai Buloh, Shah Alam, tbk vialte aa tel dih.
Kan pawngkam ah zawtnak a karh tuk caah leng kan chuah fatin kut thiang tein ṭawl le sanitiser hman daithlang hin hlah usih. Mask hruk loin lengchuah lebang ahcun palek nih tlaih le tangka RM10,000 tiang dantat khawh asi.
