Malaysia Chinmi: ‘UN catlap damiah nih an ka chuh’ tiah lih in palik sakhan ah ṭhohkhansa lak caah an tlaih

- Advertisement -

Atu lio hi UNHCR catlap aa tlaihmi pawl cu an catlap nithla a dih i tatṭan an ṭu tikah card an pek hna, cucaah Chinmi cheukhat cu rianrang in card ngah an duh caah ‘ka UNHCR catlap damiah nih an ka chuh…’ tiah lih in palik sakhan ah report an tuah i ṭhohkhansa an lak. Palik ṭhohkhansa cu UNHCR zungah an i put i card an pek hna.

Nain hnu ah palik nih an tlaih hna. Palik sakhan ah lih in report tuah ahcun ‘lih case’ in tlaih i a saubik thla 6 thongthlak le RM2,000 dantat khawh asi.

Malaysia Chin ralzaam bawmtu ACR zung in Saya Ai Lwin nih, “UN catlap aa tlaihmi pawl nih card ngah an duh caah cheukhat tlaih an tonmi ka hmuh tikah ka lungṭha lo tuk. Midang tlaih an ton tinak hnga lo mah kong hi mi tampi hmuh dingin SHARE cio usih,” tiah a chim.

Mah hi palik sakhan ah lih in report tuah ruangah palik nih an tlaih i ni 14 chung sakhan ah thong an thlak hnu ah baiceihzung nih RM500 dantatmi receipt asi.

Saya Ai Lwin nih, “Na UN catlap na thlau ahcun palik sakhan ah ‘ka thlau’ tiah a dik ning tein na chim lai. Damiah nih an in ṭaih ahcun ‘damiah nih an ka ṭaih’ tiah a dik ning tein chim ding asi,” ati.

“Aruang cu, palik sakhan ah damiah nih an ka ṭaih tiin na chim ahcun palik phungphai bangin ‘case tlaitu palik va tong’ an in ti lai. Nangmah nih na va ton lo zongah case tlaitu palik nih phone an chawnh lai i ‘damiah nih an in ṭaihnak hmun, caan le zeitin dah an in ṭaih, tbk vialte’ an hal lai i damiah cu tlaih dingin hlathlainak an tuah lai.

“An ka ṭaih na tinak pawngkam CCTV vialte an check dih lai i an in ṭaihnak zawn le caan ah zeihmanh um lo (na lih) ahcun ‘palik na hlen hna’ tiah lih case in an in tlaih lai.

“Cucaah, palik sakhan ah ṭhohkhansa na lak tikah na UN catlap na thlau ahcun ka thlau tiah a hman ning tein chim law, damiah nih an in ṭaih ahcun an ka ṭaih tiah a hman ning tein chim.

“Palik nih ṭhohkhansa an ka pe duh sual lai lo ti phun in ‘damiah nih an ka ṭaih e, an ka chuh e’ tiah lih chim hrimhrim lo ding hi a biapi tuk.

“Lih case in palik nih an in tlaih ahcun ni 14 chung sakhan thong (lockup) ah an in thlak hnu ah lih case in biaceihzung ah taza an in cuai lai. Biaceihtu nih a duh cun thla 6 tiang thong an thlak khawh i RM2,000 tiang dan an tat khawh caah dantatmi man le sihni nai hlannak ding man zong hi a fawi lo ngaimi si.

“A chimrel zia ka thiam lomi um ahcun a ruahzia tu ka thiam hram uh. Mah kongah kan miphun tlaih an ton tinak hnga lo mi tampi hmuh dingin SHARE cio usih,” ati.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...