Malaysia: Chinmi tamnak Selangor state peng 6 cu May 6 in 17 tiang lockdown (MCO) an si lai

Chinmi tampi kan umnak Selangor state peng 6 cu May 6 in 17 tiang lockdown (MCO or Movement Control Order) an si ṭhan lai, tiah cozah nih nizaan ah a thanh.

Selangor state ahhin peng (district) 9 um nain COVID-19 zawtnak a karh biknak peng 6 lawng MCO tuah an timh hi si. Mah peng 6 hi Chinmi tampi kan umnak asi.

MCO tuah ding peng 6 cu:

  1. Hulu Langat,
  2. Petaling,
  3. Gombak,
  4. Klang,
  5. Kuala Langat le
  6. Sepang hna an si.
A senmi hi MCO (lockdown) ding peng 6 cu an si.

Chinmi tam taktak kan umnak khua pawl; Cheras, Sungai Long, Puchong, Petaling Jaya, Shah Alam, Subang Jaya, Klang, Kajang, Ampang, Sungai Buloh, Rawang, tbk vialte hi MCO tuah ding peng 6 chungah a ummi lawngte an si.

Chinmi tam chinchin kan umnak Kuala Lumpur zong May 7 in 20 tiang MCO an tuah lai. Mah hi hmet law rel khawh asi.

Malaysia Chawlehnak Vuanci Zung nih, “Phihmi sipuaizi cazin ah telh lomi; sehzung le thil zuarnak dawr, tbk sipuaizi paoh cu kan onh dih ko, nain COVID-19 zulhphung (SOP) nan zulh dih lai,” tiah a thanh.

Selangor state ummi nih MCO chungah nan zulh ding COVID-19 zulhphung cu hmasa MCO lio he khan aa khat dih ko, ati.

Selangor cu Malaysia ram ah minung tambiknak state asi bang mizaw tambiknak state zong asi. Ni kum 2020 in MCO an tuah lengmang cang. Tutan hi avoi 3nak MCO an tuah si cang lai.

May 6 in 17 tiang cu restaurant ah ṭhut in ei a ngah lai lo. I kalpi (takeaway siloah bungus) lawng ngah lai.

“Company pawl ahcun rianṭuantu cheuthum cheukhat (30%) lawng punghman in zungkai a ngah lai. Adang 70% cu boss te nih aa tlak ningin zung kai caan nan tuahpiak hna lai siloah inn in a langpar in nan ṭuanter hna lai,” tiah Chawlehnak Vuanci Zung nih a thanh.

Phihmi sipuaizi pawl

Spa dawr, malitnak dawr, nightclub le pub, lentecelhnak le nuamhnak hmun (theme park), inn chung certual, chungkhar karaoke le cenema, zaanglek (bawlung, chinlung, volleybal, tbk) le khat le khat hnor a haumi lentecelh paohpaoh.

Cozah theihpinak in tuahmi Malaysia Rampumpi Bawlung Chuih Zuamnak, Chinlung Chuih Zuamnak, tbk pawl cu cozah sin nawl hal hnu ah inn leng certual ah tuah a ngah – Laimi lentecelhnak zeihmanh a ngah lo.

Hawikom le mibu in ramtang vah le tlangkai, mibu in tlik zuam, mibu in saikal cit, mibu in marathon tlik, tilio zuamnak, tbk pawl zong a ngah lo.

MCO tuah ding Selangor state peng 6 in peng dang le state-dang kal zong ngah lo. Peng dang le state-dang in Selangor state 6 kal zong ngah lo.

Pumh, sianginn kai, meeting, cawnpiaknak, mibu biaruahnak, tintan pek/kai, civui, tbk mibu in tuahmi zeihmanh ngah lo.

Rianṭuanmi pawl cu na boss nih peng dang le state dang kal na hauhnak kong ca an ṭialpiak cun lamkhamtu palek le ralkap nih an in lanhter ko lai.

Chinmi ralrin kan herh: Hmasa ahcun MCO zulhphung a zul lomi cu a tambik RM1,000 tiang lawng dantat asi caah a zul lomi an tamtuk i atu cu RM10,000 dantat dingin upadi an ser cang. Malaysia rammi minthang pawl hmanh minung RM10,000 in nuva RM20,000 dantatmi le chungkhar RM60,000 dantatmi hna an um.

“Voi dang zongah peng dang le state dang ka kal ko nain zeihmanh ka tong hlei lo” tiin daithlan awk si lo. Palek he nai ton lo caah asi. Nai ton sual ahcun na ngaichih tuk lai nain zeihmanh santlai ti lai lo.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...