Kuala Lumpur — Pudu sang um Chinmi 3 cu Covid-19 lunghrinh case in sizung ah an chiah hna. Anmah he um ṭimi Chinmi 40 leng zong mawtaw in an kalpi hna i Sungei Besi sang um inn nganpi pakhat ah lengchuak loin an congh (quarantine) hna.

Pudu sangah Covid-19 zawtnak ngei 30 leng an um ruangah cozah nih May 14 thokin thilri hling in a kulh i hohmanh leng chuak loin palek nih an congh hna. Mah chungah zawtnak an ngeih/lo an test thluahmah hna. Rawl an pek hna. Pudu sang ahhin Chin chungkhar 400 leng (milu 1,300 hrawng) an um ve.

Sizung ah chiahmi 3 lakah 1 cu nu asi. TB zawtnak a ngeimi si. A taangmi pa 2 lakah pakhat cu lung zawtnak a ngeimi si — an min le khua cu kan langhter lai lo.

“Nilini (May 14) zaanlei ah kan umnak sang Pudu cu thilhri hling in an kulh i zawtnak kan ngeih/lo a kan test colh. Zarhpini zaanlei ah palek mawtaw le ambulance in inn 2 um Chinmi 37 a kan lak. Kan pum ah putetse a kan kah dih hnu ah a kan kalpi. Kan inn zong putetse an kah dih,” tiah quarantine mi pakhat nih The Chin Express ah a chim.

“Kan farnu pakhat le pa pakhat cu Ampang Sizung ah an kalpi hna. Covid-19 zawtnak an ngei ti cu an chim lo, TB le Lung zawtnak a ngeimi an si i lunghrinh case deuh an si. Hnu ah kan farnu cu Sungai Buloh Sizung ah an ṭhial.

“Adang pawl cu Sungei Besi sang um Institute Social Malaysia timi inn nganpi ah a kan chiah. Sizung ah chiahmi 2 he inn 1 ah a umṭi mi lawngte kan si. A kan chiahnak cu khaan tampi um. Ihphah, aircond, tbk., zong ṭha tein a kan chiahpiak dih i a thianghlim ngai. Khaan khat le khat ummi kan i tong kho lo. Innleng in cun kan i hmu kho ko nain i ton ngah lo.

Mah inn ahhin quarantine an tuah hna – Institute Social Malaysia

“Hnu ah Imbi um Chinmi 2 le Pudu um Chinmi 3 hrawng an rung chiah ve hna. Bangladesh le Indonesia pawl zong an chiah ve hna.

“Cozah nih ni 1 ah rawl voi 3 a kan pek. Malay rawl ahcun a ṭha deuhmi pawl asi nain leng a chuak tuk lo i Lai chumh rawl deuh lawng a ei tawnmi kan nupile le kan fale cu an ei kho lo. Lenglei in Laimi nih rawl a kan chanh nain a kan congtu palek nih lenglei rawl a kan eiter lo. Kanmah pekmi lawng nan ei lai, quarantine nan si a kan ti.

“Ni 14 hnu ah kan in ṭinter te hna lai a kan ti. Kanmah he lakmi lak ahcun minung 2 lawng sizung ah an chiah hna.

“A kan check lio ahhin kutpi a kan namter, cun catlap ah number an ṭial, kan ṭaang ah a kan tlaihter i hman a kan thlak. Mah lio hrawng cu a kan hro ngai. Kan nupi le le kan fale cu an thinphan nak ah a thathermi zong an um len.

“Nain, quarantine hmun kan phak hnu cun hro um ti lo. Pudu lockdown chungah aa tapmi pawl he phone kan i chawn pah tawn i quarantine um hi a fawi deuhmi a lo.

“Atutiang ahcun a kan test man le quarantine man tangka liam kong zeihmanh an chim rih lo. Malaysia ummi cu free si ko rua ka ti,” tiah a chim.

Pudu lockdown chungah a um liomi pakhat nih, “anmah an lak hna hnu ah Chinpa 2 an lak rih hna. Pakhat cu Sizung ah an chiah. Chinmi lawng si loin Bangladesh rammi le an inn block um Rakhine, Mon, Indonesian, Indian, tbk., pawl zong an lak hna i quarantine tuahnak hmun ah an kalpi hna,” tiah a chim.

Chin ralzaam bu upa pakhat nih, “Imbi um Chinmi 2 cu sizung ah an chia hna lo. Quarantine an si. Pudu um Chinmi 3 balte sizung ah an chiah hna. Mah zong cu Covid-19 an ngei tiin fehter (confirm) asi rih lo,” tiah a chim.

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...