Cambodia PM Hun Sen nih ASEAN hruaitu pawl ruahnak hal hmasa loin Myanmar a tlawnmi cu kan lungṭha lo ngai, tiah Malaysia Ramdang Vuanci nih a chim.
Kan hnu zarh ah, Cambodia PM nih Myanmar khualipi Naypyitaw ah uknak firtu Min Aung Hlaing a tlawn ton. Myanmar ralkap nih mipi thimmi cozah uknak a chuh thokin a tlawng tong hmasa bikmi ramdang hruaitu asi.
Cambodia cu atu lio ASEAN ram 10 chairman asi caah amah nih Myanmar a tlawnmi cu uknak firtu cohlan bantuk asi caah apoi ngai, tiah mi tampi nih an soisel.
Malaysia Ramdang Vuanci Datuk Seri Saifuddin Abdullah nih, “PM Hun Sen cu Cambodia ram hruaitu aiawh in Myanmar tlawnnak nawl a ngei ko.
“Nain, ASEAN chairman zonh asi cang caah Myanmar ka tlawn tikah zeitin dah biachim ning law a ṭhat hnga tiin ASEAN ram 10 hruaitu pawl ruahnak a kan hal hmasa awk asi tiah kan ruah.
Malaysia, Singapore, Philippines le Indonesia cu uknak firtu Myanmar ralkap cozah a soisel ngaitu an si.
Hmai zarh hi Asean Ramdang Vuanci pawl cu Cambodia ah meeting tuah ding an si nain an thawn.
Myanmar ralkap nih uknak a fir hnu in rammi 1,400 leng a thah cang hna. Thong tampi a tlaih thongthlak cang hna.
Ni kum October thla ah, Min Aung Hlaing nih Asean palai cu Aung San Suu Kyi tonnak nawl a pek duh lo caah Asean meeting kaiter lo dingin bia an chah. Mah lio Asean chairman le palai cu Brunei ram asi.
Mah bu cun, Asean Chairman thar Cambodia PM Hun Sen nih Min Aung Hlaing cu Naypyitaw bakah a va tlawn pinah ‘ni kum Asean palai nih rak tlawng seh law thl ṭha a chuak cang khomi si’ ati chap bei rih.
