Phungninglo ramdangmi pawl an ram cio ah khirh dingin an chiah hna nak Bukit Jalil Lahwahkah Thong (Camp) ah Covid-19 zawtnak ngei 35 an hmuh hna. 17 cu Myanmar rammi an si.

Ngandamnak Vuanci Zung nih, “zawtnak ngei 35 hi cozah nih lengchuah a khap (MCO) hlan ah tlaihmi pawl an si. Zeitin dah zawtnak an ngeih ti kan hngal kho rih lo,” tiah a chim.

“An ram ah nan khirhmi ramdangmi pawl Covid-19 zawtnak an ngei tiin International Regulation Committee nih thawng a kan thanh caah Bukit Jalil Camp i Block A ah chiahmi pawl kan test hna hi si.

“Block A ah chiahmi dihlak 645 kan test dih hna. Cheukhat cu zawtnak letkhana an ngei. Kan testmi hna chungah 35 zawtnak an ngei.

“35 cu Myanmar rammi 17, India 15, Sri Lanka, Bangladesh le Egypt rammi 1 cio an si.

“Block A ah chiahmi pawl cu hnu ah chiahmi pawl he an i chawh lo tiah thong/camp congtu pawl nih a kan chimh,” tiah a chim.

Malaysia Sibawi le Zatlang Bu pawl nih, “mah camp ah chiahmi dang pawl zong zawtnak an chawnh sual hna lai ti kan phang tuk,” tiah an thinphannak kong an chim.

“Camp zohkhenh rian a ṭuanmi pawl ca zongah thinphan dai lo asi.

“Lahwahkah nih phungninglo ramdangmi a tlaih hna tikah, a tlaihnak hna hmun ah Covid-19 zawtnak an ngeih/lo test dih hmasa hna sehlaw a ṭha. Test hmasa loin camp ah a chiah colh hna ruangah camp ah zawtnak i chawnh a fawi tuk.

“Cozah hrim nih Covid-19 pulrai chung ahcun phungninglo ramdangmi tlaihkhihnak tuah lo dingin thawngthanh chung sehlaw a ṭha.

“Camp ahcun minung an i tet tuk caah thianghlim tein an um kho lo i zawtnak i chawnh a fawi tuk. Tlaih tharmi pawl an rung chiah chapmi hna nih zawtnak an chawnh hna lai ti zong phan a um,” an ti.

UN Special rapporteur González Morales nih, “camp ahcun khat le khat i hlat deuh in um awk zong a ṭha lo. Kha bantuk camp ah phungninglo ramdangmi chiah chap lo dingin Malaysia cozah kan nawl hna,” ati.

“Lahwahkah nih phungninglo ramdangmi tlaihkhihnak nan tuah peng i camp ah nan kuat peng hna ahcun camp ah chiahmi vialte zawtnak an i chawn kho. Camp zohkhenh rian a ṭuanmi pawl zong zawtnak an i chawn kho,” tiah North-South Initiative director Adrian Pereira nih a chim.

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...