Nizaan Ningani ni 1 chung te ah COVID-19 zawtnak ngei 27,808 bak an hmuh hna. Tihni zong kha 26,701 bak an hmuh hoi hna.
Mah he cun, COVID-19 pulrai aa thokka in atutiang ah Malaysia ah zawtnak ngei hmuhmi dihlak hi ting 30 leng (3.17 million) an si cang. Nain an dihlak dengmang (2.9 million) an dam cang.
Nizaan ah zawtnak ngei 27,808 an hmuhmi hna hi pulrai aa thokka in atutiang ah ni 1 chungah mizaw tambik 2nk an hmuh ni asi. Nithumni kha ni 1 chungah mizaw tambik an hmuh ni asi i 27,831 bak an hmuh hna.
Nizaan ah COVID-19 in minung 36 bak an thi. 1 cu a ruak in sizung ah an hung phakpi. Malaysia ah COVID-19 in a thimi dihlak 32,276 an si cang.
Nizaan ah zawtnak ngei 27,808 an hmuhmi hna lakah;
- 27,689 cu ram chungah zawtnak aa lakmi an si
- 119 cu ramdang ah zawtnak aa lakmi (ramdang in Malaysia ah a hung lutmi) an si.
Vanchiat lei vanṭhat ah, nizaan ah zawtnak ngei 27,808 an hmuhmi hna cu an dihlak dengmang (99.63%) hi fak in an zaw lo. An pum chungah COVID-19 rungrul an hmuhmi te lawng si i zeitin hmanh an um lo. Minung 103 lawng hi sizung piah hau tiangin a zawmi cu an si.
Atu hi sizung i mizaw zual thlopnak khaan (ICU) ah COVID-19 mizaw 235 an um lio asi. 132 cu thawpeknak seh an bunh hna.
Ngandamnak Vuanci Zung i director-general Dr. Abdullah nih, “Atutiang ahcun cozah sizung pawl ah COVID-19 mizaw ca he mizaw dang ca he ihkhun a lawngmi tampi rih ko. Cun, hiti ningin a karh peng sual i ihkhun an khah dih zongah cutin kan cawlcang lai tiin state vialte redi in an um dih ko,” tiah a chim.
Tuni ah mizaw hmuhmi zat cu thaizing 10am ah an thanhte lai.
