Tu zingka ah US in Malaysia ah Pfizer-BioNTech raikhamsi 1 million a phan.

Kuala Lumpur um US Tanzung nih, “Raikhamsi cu Sulta Abdul Aziz Shah Airport ah a phan. Malaysia rampumpi ah an phawtzamh lai,” tiah cathanh a chuah.

US Tanzung Lutlai Pu Brian McFeeters nih, “COVID-19 pulrai tei dingin le vawlei pumpi ngandamnak ṭhatter dingin US nih Malaysia he i bawmh kan duh,” tiah a chim.

“US le Malaysia cu mipi ngandamnak caah caan saupi chung aa rak bawm lengmangmi kan si. Atu cu minung nunnak khamh dingin Malaysia bawmh hi usa kan pek bikmi asi.

“Malaysia cozah nih a ram damnak caah Rampumpi Raikhamsi Chunhnak Simanking a suaimi hi a rannak in a tlamtlin ter dingin US nih Malaysia cozah bawmh kan duh,” ati.

US President Joe Biden nih ‘pulrai nih fak khun in a denmi ram sifak pawl raikhamsi kan bawmh hna lai’ a timi chungin an bawmhmi hna asi.

President Biden nih vawlei pumpi ah raikhamsi 80 million kan bawmh hna lai a timi chungin an bawmhmi hna asi i Malaysia hi an bawmh hmasa bikmi ah aa tel ve.

Indonesia, Philippines, Vietnam, Thailand, Laos, Papua New Guinea le Cambodia, tbk zong an bawmh ve hna lai.