Danny Thian Lian Khup, kum 32 nih zahan August 6 ah COVID-19 in a kan liamtak.
COVID-19 zawtnak a ngeih hnu ah GHKL sizung ah zarh 2 chung aa thlop nain chanh khawh loin zahan zaan 8pm ah a kan liamtak hi si.
Kuala Lumpur um Falam Christian Community (FCC) ah Sunday school saya a ṭuanmi, FCC khrihfabu nih bochan ngaimi, mifel asi.
Phaitaya, Kalay ah khuasami Pu Tial Thuan (tleicia) le Pi Saw Cung hna i an fapa asi.
Tantakmi chungkhar nan ngaihchiatnak kan in tuarpi hna. Pathian tu nih in umpi ko hna seh tiah thlaza kan in campiak hna.
Atu lio cu COVID-19 lockdown ruangah mipi nih ruak humh le vui a ngah lo caah Falam Refugee Organization (FRO) le FCC upa pawl lawng nih an vui lai.
Min: Danny Thian Lian Khup
Chuahni: 04 January 1989 (Kum 32)
Nulepa: Pa Tial Thuan (Tleicia) le Pi Saw Cung
Khua: Phaitaya, Kalay
Umnak: Kuala Lumpur, Malaysia
Umnak khrihfabu: Falam Christian Community (FCC)
Thih Ni: 6 August 2021 (Friday)
Atu lio Malaysia Chinmi boruak
Malaysia cu COVID-19 zawtnak a karh tuk caah cozah nih June 1 in atutiang lockdown a tuah i Chinmi rian kan ṭuan khawh lonak thla 3nak asi cang.
Rianṭuan lo cang cun tangka kan ngeih hna lo caah inn, ti le mei man pek awk kan harsa taktak hna. Ahlei in fa tam a ngeimi chungkhar an har khun. Rawl balte hi cu Malaysia rammi Tuluk pawl nih ‘ṭam dawn’ tein a kan bawmh i aa ning deuh.
Mah lio ah COVID-19 zawtnak nih Chinmi tampi a kan den ve. Tangka ngeih lo lio le lungretheih lio asi caah zawtnak nih den chih ahcun lung a zor ngai i dam zong a har deuh ngai.
Sizung ah i thlopnak le eidin tirawl ṭha deuh in i canhnak zong tangka chanbau lio asi caah a har khun. Har hnih le har thum aa thuat caah a fawi lo taktak, mah ruangah Malaysia um Chinmi tampi COVID-19 in an thi cang.
Ramthumnak ummi hna, Malaysia ah nan chungkhar an um ahcun, ahlei in atu lio hi an zawt ahcun daihthlanh hna hlah uh tiah cah kan in duh hna.
