Malaysia Ramchung Vuanci Pu Hamzah Zainudin (hmanthlak) nih, “Kan ram ah refugee an tam tukmi hi kan rammi tam deuh nih an duh lo tiin ka ruah,” tiah media sinah a chim.
“Ramchung Vuanci Zung cazin ningah, atu lio hi Malaysia ah UNHCR card aa tlaihmi 179,383 an um.
“Kum 2013 ahcun 140,983 lawng an um. An karh tuk.
“Kan ram ah refugee a tomtom in an rat pengmi piahtana hi phisin dingin Ramdang Vuanci Zung le UNHCR he kan ṭuanṭi lai.
“Kan ramah refugee an tam tukmi hi kan rammi tam deuh nih cun an duh lo tiah ka zumh. Refugee pawl kan ram ah an um thaimi nih hin kan sang le khua ah thil ṭha lo tampi a chuahpi khawh.
“Mah tein aa ukmi le upadi ngeimi ram kan si bantukin, kan ram ah refugee an tam tukmi piahtana phisin dingin aphi kan kawl hau,” ati.
Kan hnu zarh ahkhan Malaysia chaklei rili ah tilawng in luh aa timmi Rohingya refugee pawl an khirh hna nak aruang media nih an hal i atu bantukin a leh hna hi si.
“Hi tlukin kan ramah refugee an karh lio ah, cozah nih refugee pawl zohkhenh hna dingin cozah dotu media nih hlathlainak a tuahmi hoi hna hi cu ka khuaruahhar.
“Refugee an tam tuk ahcun kan ram ah zatlang buainak tampi an chuahpi khawh, cucaah mah bantuk refugee khirh cu nan duh maw? tiin media nih Malaysia rammi pawl an hal hna awk tu asi deuh.
“Refugee tam tuk an rat pengmi piahtana hi ṭuanvo ngeitu vialte, ahlei in kanmah Ramchung Vuanci Zung he kan i ceih lawngah kan phisin khawh lai.
“Refugee kan cohlan rih hna ahcun tu hnu kum 10 ah zei dah kan lawh lai ti ruah buin mah kong hi ceih a hau,” tiah a chimchap.
