Selangor state, Klang khua i Taman Mesra pawnghrawng ah palek thil i hruk in ramdangmi sinah tangka hal a hmangmi pa 4 cu Malaysia palek nih an tlaih hna.
Kan hnu zarh Nirukni zaan sml 11.30 hrawng ah Malaysia palek nih lunghrinhmi Honda motor pakhat cu an dirter i an check. Motor chungah, Malaysia palek angki le palek hmanmi phone (walkie talkie) an hmuh.
“Kum 19 in kum 36 kar simi Malaysia pa 4 nih a luancia thla 2 chungah palek kan si tiin phungninglo ramdangmi pawl cu an tlaih hna i tangka an hal hna. RM70,000 hrawng an hmuh cang,” tiah North Seberang Perai District palek bawi chang Noorikane Mohd Noor nih a chim.
“Palek ka si aa timi 4 lakah 3 cu Negeri Sembilan state ah a ummi an si i 1 cu Perak state ah a ummi a si. Phungninglo ramdangmi an um ti an theih tuk ve i thil tthalo tuah duh ahcun Selangor state ah inn an hlang.”
“Anmah 4 cu Sualnak Upadi in tazacuai an si. An sual ko ti ahcun a tambik kum 2 thongthlak silole tangka liamter silole a pahnih in dantat khawh an si.”
“Palek angki cu kan hawipa nih a kan pek an ti i cu zong cu kan hlat liopi a si. Hlen a tongmi ramdangmi pawl cu palek sakhan ah an tonmi chim dingin thawngthanhnak zong kan tuah cang” tiah Mohd Noor nih a chimchap. – Sinar
