Malaysia ah ngaknu Elizabeth Sui Dang nih hri awk in a kan thih tak

Malaysia ah ngaknu Elizabeth Sui Dang nih hri awk in a kan thih tak

Kuala Lumpur – Ngaknu Elizabeth Sui Dang nih tu zingka ah hri awk in mual a kan liam tak.

Pudu Plaza hmai an umnak innkhan chungah hri aa awk hi si. Mileng khaan a chuah bal lo caah chun 12pm hrawng ah a innkhan an hon cu hri awk in a nunnak a rak liam cang.

Hri aa awknak a ruang cu ahohmanh nih an hngal lo.

“Nizaan zong voi dang bantuk tein rian a ttuan ko, anih hi Pudu i cauk dawr ah a ttuanmi si. Tu zingka zong market ah thil a caw ko nain a ttin hnu ah hri aa awk hi si, aruang kan hngal bak lo,” tiah naihniam pakhat nih The Chin Express ah a chim.

“Ngaknu Sui Dang hi 2013 card ngah a si ve caah atu cu UNHCR card ngei ti loin catlap lawng aa tlaih i ram thumnak kal ding ruahchannak a ngei ve ti lomi si. Malaysia a phanhnak kum 6 hrawng a si cang.”

“Anih hi mifel, mi daite a si. Hitin hri aa awk cu kan khuaruah a har ko. Kan ngaihchia tuk,” tiah a chimchap.

Kum 22 lawng a si rihmi ngaknu Sui Dang cu Thantlang peng, Surngen Tisen B khua a si i Pu Mang Bawi le Pi Ni Thlei hna i an fale unau 5 lakah fahniang bik a si.

A ruak cu palek nih sizung ah an kalpi cang.

“Zeitik ah dah a ruak lak khawh a si lai ti a fiang rih lo. A ruak cu Laitlang lei a chungkhar sin ah kuat dingin khuakhan cuahmah lio a si, a tlamtlin khawhnak hnga thlacamnak in kan bawm cio u,” tiah upa pakhat nih a chim.

Tantakmi chungkhar le hawikom vialte, nan ngaihchiatnak kan in tuarpi hna, kan biak Pathian nih in umpi ko hna seh.

Leave a Reply

Your email address will not be published. Required fields are marked *