Malaysia um Kawlrammi pa pakhat cu Penang state khualipi Butterworth um sehzung ‘Mak Mandin Industrial Estate’ a remh lio ah a tla i a nunnak liam.

Mohd Hussin Fazal Ahmedh, kum 51 cu Myanmar rammi asi. January 10 zaanlei ah pe 100 hrawng a sannak inn cungin a tla, tiah Malaysia media New Straits Times nih a ṭial.

A ruak cu rawl chiahnak kudawng chungah an hmuh.

Pengkulh palek bawi changtu Norrzainy Mohd Noor nih, “hlathlainak kan tuah tikah sehzung a remh lio ah inn cungin a tla ti kan hngalh,” tiah a chim.

“Sehzung cungcih ah kua nganpi a um i welding a saw lio ah a tlaknak si lai tiah kan zumh.

“Zaanlei 1:35pm hrawngah thawngpang thangpi ka theih tiah sehzung rianṭuan pakhat nih a chim.

“Zoh dingin a va kal tikah thisen nih a rak zual dihmi mipa ruak cu a hmuh.

“Lutlai pawl a chimh zokzok hna i palek sinah thawng an thanh colh,” ati.

Mipa ruak cu sibawi nih check dingin Seberang Jaya Hospital Forensic Department ah an kuat.

Mi nih thi dingin an tuahmi cu asi lo, tiah palek bawi changtu nih a chim.

Ruah lo piin a thi, tiah palek nih case an tuahpiak.

A min zoh tikah Kawlram in a rami Rohingya (Bengali) asi.

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...