Malaysia ram pumpi ah Covid-19 zawtnak ngeimi minung 4,228 an si i cu chungah minung 416 cu ramdangmi an si.
“Covid-19 zawtnak ngei ramdangmi pawl cu Indonesia (53), India (37) Myanmar (31), Pakistan (29), Philippines (27) le a tangmi cu ram dangdang in an si hna,” tiah Malaysia Ngandamnak Zun director-general Datuk Dr. Noor Hisham Abdullah nih tuni ah a chim.
Myanmar rammi 31 hi zei miphun ti a langhter lo, nain Rohingya si dawh an si.
Cun, Malaysia ram ah Covid-19 in a thimi minung 67 an si cang i, cu chungah Pakistan rammi 1 le Indonesia rammi 1 an i tel.
Dr. Noor Hisham nih “ralzaam le ralzaam soktu pawl zong cozah Covid-19 cazin le i runvennak ah telh hna ve dingin UNHCR le Ngandamnak Vuanci Zung kan i bawm,” tiah a chim.
“Ramdangmi pawl cu Covid-19 zawtnak an ngeih ahcun an ram tanzung cio ah thawng kan thanh lai.
Tuni ah Malaysia ah Covid-19 zawtnak ngeimi minung 109 an hmuh chap hna. Zarh 2 chung mizaw hmuhmi lak ah a tlawmbik a si. Cun, tuni ah 121 an dam. A dammi dihlak minung 1,608 an si cang.
Cun, tuni ah minung 2 an thi chap. Tuni a thimi ah pakhat cu kum 23 nu a si i hrom zawtnak a ngeimi a si. Malaysia Covid-19 in a thimi lakah kum no bik a si fawn. A dang pakhat cu kum 66 pa a si.
“Atu hi mizaw 72 cu mizaw zual zohkhenhnak khan ah an um i cu chung ah mizaw 43 cu ventilator bunh an si,” tiah Dr. Noor Hisham nih tuni ah a chim.
