Malaysia Ngandamnak Zung lutlai Dr. Noor Hisham Abdullah nih, “Chawnh a fawi tukmi COVID-19 rungrul thar Omicron zawtnak ngei minung 11 kan hmuh chap hna, 13 an si cang. Ramdang in Malaysia a rami sin lawngte ah kan hmuh,” tiah tuni December 18 ah a chim.

Malaysia ram hruaitu Prime Minister Pu Sabri Yaakob nih, “Kan ram ah COVID-19 zawtnak ngei hmuhmi an zor ti phun in daithlang hlah uh, rungrul thar Omicron hi i ralrin a hau,” tiin mipi ralrin peknak bia a chim.

Tuni hi Malaysia ram ah COVID-19 zawtnak ngei 4,083 an hmuh hna, mah chungah Omicron zawtnak ngei 11 an si — Malaysia cu ni fatin COVID-19 zawtnak ngei thong 5 le thong 6 hrawng peng an hmuh hna i atu hi tlawmte zor lei a panh.

Malaysia cozah media Bernama nih, “Malaysia ram hi COVID-19 zawtnak in a him rih lo ti hi mipi nih an theih a herh. Zulhphung felfai tein an zulh le voi 3nk raikhamsi an i chunh a herh, tiin Prime Minister nih a chim,” tiah tuni ah a thanh.

“Rianṭuan cu kan phit ti lai lo tiin mipi bia ka rak kamh cang hna caah zawtnak a karhnak hnga lo aho paoh nih zulhphung felfai tein zulh cio a herh tuk.

“Rianṭuan phih ti lo dingin bia ka kamh ko hna nain, mah COVID-19 rungrul thar Omicron hi kan ram chungah a karh bak ahcun ka biakam pehzulh a fawi lai lo.

“Cucaah, ralring tein le felfal tein um cio ulaw mask i hruk peng uh, mibu nganpi in um hlah uh, zulhphung felfai tein zul cio uh.

“COVID-19 kan tei cang ti phun in khapmi vialte a dorhmi ram tampi ah zawtnak a karh tuk ṭhan i khuaci mui in lockdown an tuah ṭhanmi zong kan hmuh cio, hihi Malaysia ah kan ton ve ding kan duh lo,” ati.