Malaysia ram ah Covid-19 zawtnak aa thok ka in nihin tiang ah a dammi 300,000 leng an si cang.

Zawtnak ngei hmuhmi dihlak 319,364 an si. Atu lio Covid-19 in a zaw cuahmahmi 17,544 an si.

Ngandamnak Vuanci Zung director-general Tan Sri Dr Noor Hisham Abdullah nih, “Tuni March 11 ah Covid-19 in a dam i sizung in ttin termi 2,104 an si,” tiah tuni ah a chim.

“Kan ram pumpi ah Covid-19 zawtnak in a dammi 300,620 an si cang. Mizaw dihlak dengmang 94.1% an dam cang,” tiah Dr Noor Hisham nih a chim.

Tuni ah Covid-19 zawtnak in a dammi an tampi bang mizaw thar hmuhmi 1,647 an si.

Mizaw thar hmuhmi lakah 5 cu zawtnak ngeicia in ramdang in a rungtlungmi an si. A tangmi paoh cu ramchung ah zawtnak aa chawnmi an si.

Tuni mizaw thar hmuhmi lakah Selangor state in mizaw an tambik, 712 a si.

Pahnihnak ah Johor state si i mizaw thar 170 an si. Penang in mizaw thar 169 le a tangmi pawl cu state dangdang in an si hna.

Liamcia suimilam 24 chungah Covid-19 zawtnak in a thimi minung 9 an si. An dihlak in Malaysia rammi an si i kum 48 in kum 78 kar an si hna.

Atu hi Malaysia ah Covid-19 raikhamsii an chunh cuahmah cang hna. Malaysia ram hruaitu pawl zong an i chun dih cang. Tu thla chung ah ngandamnak lei rianttuanmi minung 500,000 tiang chunh an timh. – The Star