Tuni February 25 ah Malaysia ram, Puchong khua, Tesco sang ah Chin nu hri aa awk that. Nau a pawi liomi si.
An umak inn chungah si loin zapi kalnak Setiawalk innleng khamnak tlang (veranda tlang) ah aa awk. A hmutu vialte an tuksum dih. Palik an chawnh hna i palik nih ruak an hung lak i sizung ah an kuat.
Aa awknak pawngah ca bi te a ṭial chiahta. Palik nih Setiawalk ah rianṭuan aa thawhmi Hakha pa an auh relter nain Tedim holh/ca asi caah a rel kho lo. ‘Ka u ti tiang lawng ka rel khawh,’ tiah The Chin Express ah a chim.
Hri aa awk thatmi nu hi Pi Niang Dim Lun asi. A vapa le fa a rohtak hna. Ca a ṭial tami kan rel khawh lo caah aa awknak aruang kan hngal lo. Palik nih tatte caah ca cu an lak i hmanthlak zong an kan sian lo.
‘Ka u’ a timi hi a vapa maw ati siloah a chuahpi a u dah timi zong kan hngal lo. Hri aa awk thah hlan ah a vapa he an i sik/lo zong kan hngal lo.
Pi Niang Dim Lun, kum 33 hi Chin state, Tedim peng, Kah Gen khuami asi.
Malaysia ah Agape Khrihfabu le ZAM chungtel asi. Ruak lak le vuinak kong cu ZAM (Zomi Association of Malaysia) nih a tawlrel lio si.
2009 in tuni 2022 February 25 tiang ahhin Malaysia ah Zomi 400 leng an thi cang. Chinmi dihlak a thimi cu 3,000 leng an si cang.
Malaysia ah thih tiang um ding hi Chinmi hohmanh nih kan i tinhmi asi lo. Ram thumnak kal dingin kan i dor ta lio ah hi zatzat kan liam cu ngaihchia hringhran.
