Malaysia numhnak hmun pakhat in zarh khat leng a tlau cangmi Irish (Ireland rammi) nute Nora Quoirin a hmutu RM50,000 laksawng kan in pek hna lai tiah a chungkhar nih tuni ah thawng an thanh.

“Nora cu kan fa upabik a si. Kan caah a sunglawi tuk i kan lungkuai ko,” tiah Nora a nu Meabh Quoirin nih tuni ah a chim.

“Nora a umnak kan theih khawhnak hnga mipi nih na kan bawmhnak lai kan in nawl hna. Malaysia palek zong nih biatak tein Nora inn a ttin khawhnak hnga a kan zuampiak cang.”

“Ireland ram khualipi Belfast ah hrambunhmi company pakhat nih RM50,000 cu kan fanu kawlnak caah a kan hlut,” tiah a chimchap.

A tlaumi Nora (kum 15) cu a chuahka in thil cawn aa harh ngaimi a si. August 4, 2019 ahkhan Negeri Sembilan state thlanglei um Dusun eco-resort (nuamhnak) ah a tlau. Malaysia nawl ngeitu nih an kawl peng nain tuni tiang an hmu rih lo.

“Nora tlaunak kongah England, France le Ireland ram in palek tampi nih kherhhlai an kan bawmh. Anmah pawl cu kan hnu zarh ahkhan Malaysia ram an phan,” tiah Malaysia cozah nih a ti. _ CNA

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.