Malaysia ah a tlaumi Chin ngakchia nute cu thla 1 hnu ah a nulepa sin a phan

November 8 ah Chin ngakchia nute cu amah lawngin lengchuak i a tlau
A nu le an chungkhat nu cu ‘nan fa ṭha tein nan zohkhenh lo’ tiin palik nih an tlaih tazacuai hna
Nule 2 cu palik nih an tlaih thongthlak hna
Thla 1 hnu December 14 ah Ngakchia Zohkhenhtu Phu nih a nulepa sinah an hung chiah

Cheras khua, Taman Lansing sangah a um Chinmi Pu Shin Phong le Pi Mary hna i an fa nute Mary Hlay Samg cu November 8 ah amah lawngin inn leng a chuak i lamkam ah Malaysia rammi 1 nih a hmuh char i palik sakhan ah a va chiah — a nulepa nih cun an thei rih lo i a tlau tiin an ruah.

Malaysia Chinmi i zohkhenhnak bu Alliance of Chin Refugees (ACR) in Saya Ai Lwin nih Kajang Palik Sakhan ah ‘kan kawlpiak uh’ tiin ngakchia tlau kong cu report a tuah.

Case tlaitu palik bawi nih a tlau ning a hlat hnu ah biaceihzung ah a kuat. Biaceihzung nih Mary Hlay Samg anu le nau umtu an chungkhat nu cu ‘nanmah palh asi, nan fa zohkhenh nan daithlang tuk, biaceihzung ah ra chuak uh’ tiin nawl a chuah. Hringtu nu le nau umtu nu cu palik nih an tlaih hna i Palik Sakhan Thong (Lockup) ah an thlak hna.

A nule 2 cu November 18 ah biaceihzung ah an chuahpi hna nain Malay holh an fian lo caah holhlet hlan piak in December 2 ah an kong ceihte dingin biaceihzung nih a thawn. Nule 2 cu December 2 ah Fale Zohkhenh Daithlan (Kanak Kanak Seksyen) Dal 33 in biaceihzung nih taza a cuai hna. A tambik kum 5 tiang thongthlak pinah tangka 2,000 tiang dantat chih khawhnak upadi asi.

Hringtu nu cu biaceihzung ah dantatmi tangka liam in chuah khawh asi ko nain nau umtu nu cu ACR card lawng a ngeimi si caah chuah khawh ding asi lo. Cucaah a rannak in UNHCR card pe uh tiin UNHCR zungah ACR nih a nawlpiak. UNHCR nih case tlaitu palik an ton hnu ah nau umtu nu cu UNHCR card an pek colh ve.

Nule 2 cu December 2 ah biaceihzung nih tangka 2,000 veve dan a tat hna i an liam hnu ah an thlah hna.

Nule 2 cu an thlah cang hna nain biaceihzung nih nazi 36 chung Community Service tuah dingin dan a tat chih hna caah zarh 1 ah ni 4 peng palik sakhan ah an va kal i min an thut peng. December 14 ah an fa nute cu Ngakchia Zokhenhtu Phu nih an pek ṭhan hna.

A nulepa zong nih Christmas hlan ah kan fa nute cu kan pe hna seh ti kan duh ko, kan chimhpiak hna tiin ACR i Saya Ai Lwin cu an chawnh peng.

Saya Ai Lwin nih, “Malaysia ram ahcun upadi zulh a hau. Inn in ngakchia amah lawngin leng chuah hi Chinmi nih cun a poi lo ah kan ruah. Malaysia ram i ngakchia zohkhenhnak upadi hi cu fale a daihthlanhmi Chinmi caah ṭihnung ngai asi,” tiah a chim.

“Cucaah, nulepa hna nih nan fale hi anmah lawngin leng an chuahnak hnga lo innka tawh hrenh peng uh.

“Nule 2 tlaih an ton lio i pale 2 lungretheih ning hi zaangfak tuk an si. A bawmtu kanmah zong nih upadi lonh in tuahpiak khawh asi lo. Nulepa nih a rannak in an fa lak khawh an duhmi kan theihthiam ko.

“Biaceihzung nih nule 2 dan a tatmi hna tangka a kan liampiak tu Malaysia rammi Pastor Michael cungah ka lawm tuk.

“Pu Shin Phong le a chungkhar zong nuam tein Christmas hmang kho hraam hna seh,” ati.

Atu lio a linsa bikmi thawngpang pawl;