MAH: Asean palai cu Suu Kyi party member pawl tonnak nawl ka pek ko lai

- Advertisement -

Chinmi ting 1 dengmang ralzaam a kan can tertu le Thantlang telh in Chin state khua tampi ah inn a thong leng a kan duah piaktu sachia Myanmar ralkap bawizik Min Aung Hlaing nih, “Asean palai cu Suu Kyi party NLD member pawl tonnak nawl ka pek ko lai ati,” tiah Cambodia Prime Minister Hun Sen nih a chim.

Asean chairman thar a simi Cambodia PM Hun Sen cu January thla ah Myanmar khualipi Naypyitaw ah a tlawng i sachia Min Aung Hlaing he tonbiaruahnak an ngei.

A kir hnu January 26 zongah video call in meeting an tuah ṭhan.

“Min Aung Hlaing nih cun NLD member tonnak nawl ka pek lai ti lawng a chim i NLD member chungin aho te pawl dah ton khawh an si lai timi tiang cu a chim lo,” tiah video meeting a kai vemi PM Hun Sen tapeh Kao Kim Hourn nih a chim.

“Min Aung Hlaing le kan Prime Minister video meeting an tuah lio ah, Min Aung Hlaing nih Asean palai cu NLD upa pawl he ka tonter ko lai ati nain aho te pawl dah an si lai timi cu kan hngal rih lo,” ati.

Mah kong thawngfiang deuh hal dingin Reuters media nih sachia ralkap cozah biachimtu Zaw Min Tun an chawnh nain a tlai duh lo.

‘Asean’ cu Asia Nichuahthlanglei Ram 10;

  1. Malaysia
  2. Philippines
  3. Thailand
  4. Singapore
  5. Cambodia
  6. Brunei
  7. Laos
  8. Indonesia
  9. Vietnam le
  10. Myanmar kawmh a si.

Acunglei langhtermi Asean chungtel ram pawl nihhin, “Asean chungtel a simi Myanmar ram daihnak ding ahcun ralkap lawng ton loin uknak chuhmi Suu Kyi te lei zong ton ve an hau…,” an ti pengmi asi.

Ni kum ahkhan, kaphnih (ralkap le Suu Kyi te lei) tong dingin Myanmar ah Asean palai kan thlah lai…, an rak ti cang nain sachia Min Aung Hlaing nih Suu Kyi nan tong kho lo a rak ti hna caah mah lio Asean palai simi Brunei Ramdang Vuanci changtu cu Myanmar a tlawng thai lo.

Cambodia PM Hun Sen tapeh Kao Kim Hourn nih, “Asean palai thar simi Cambodia Ramdang Vuanci Prak Sokhonn nihhin avoi 1nk Myanmar a tlawn ahcun Suu Kyi a tong kho rih men lai lo,” tiah a chim.

“Kan i tinhmi cu kaphnih lutlai pawl he tonbiaruahnak tuah ding hi asi ko, nain voi 1nk ahcun an dihlak kan tong kho men hna lai lo. Voi tam nawn tlawn hnu lawngah ngahte men lai. Si ee…, Pi Suu Kyi kan ton khawh ve ahcun a ṭha tuk hnga ta,” ati.

Suu Kyi cu sachia Min Aung Hlaing nih meithal hmuah in uknak a chuh hnu ah ramkhel tuah kho ti hlah seh tiin kum 150 leng thongthlak khawh dingin upadi tampi in taza a cuai. Atutiang ah a cuainak upadi 4 hrawng cu bia an chah cang i kum 4 thong an thlak cang.

NLD party member tampi cu sachia Min Aung Hlaing nih a tlaih thongthlak dih cang hna. Adang paoh cu miphun hriamtlai phu sin le ramdang ah an zaam dih cang. Chin State Cozah Hruaitu Pu Lian Luai telh in Chin state NLD member vialte zong India ram ah an zaam dih cang hna.

Ramdang ah a zaam vemi atu lio NLD party biachimtu Nay Phone Latt nih, “Asean palai he tonbiaruahnak tuah ding kong cu kan party chungah lungtlinnak kan ngeih hmasa a herh,” tiah a chim.

Min Aung Hlaing cu ni kum ah Asean meeting kaiter lo dingin bia an rak khiah cang. Hmai zarh hi Asean ramdang vuanci pawl meeting an tuah lai, mah zong ahcun Min Aung Hlaing cu Asean chairman thar Cambodia nih a sawm lo.

Cambodia nih kan hnu zarh ahkhan Min Aung Hlaing cu, “Hmai zarh tuah ding Asean ramdang vuanci pawl meeting ah [nangmah cu kai na ngah lo caah] Myanmar aiawhtu dingah ramkheltu a si lomi pakhat in rak kaiter,” ati.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...