15.9 C
Hakha
Thursday, September 23, 2021
- Advertisement -

Ṭial Tharmi

Lungfak hringhran: Ralkap nih nizaan sandahpiahmi 42 an thah hna, 130 leng an thah cang hna

Nizaan, Zarhpini ah ralkap le palek nih sandahpiahtu 42 leng an thah hna. Tambik an thah hna ni asi. February 1 ah uknak an fir thok in atutiang ah sualnak ngei lo rammi 134 an thah cang hna.

March 3 zongah sandahpiahtu 28 an thah hna. Nizaan ah 42 an thahmi hna cu;

  • Yangon, Hlaing Thar Yar pengah minung 18 an thah hna
  • Yangon, South Dagon pengah minung 3 an thah hna
  • Yangon peng dang ah minung 17 an thah hna
  • Bago ah minung 2 an thah hna
  • Kachin state, Hpakan ah minung 1 an thah
  • Mandalay ah minung 1 an thah

Nizaan kha Yangon nitlaklei um Hlaing Thar Yar pengah mipi nih ṭhut buin ralkap duhlonak an langhter i ralkap le palek nih meithal kuan taktak in an kah hna, mitthli tlaknak gas in an kah hna, lekṭhik leihnak fung in an leih hna. Zingka 9:30 am in zaanlei khuamui tiang meithal in an kah peng hna.

Mah lio cun sandahpiahtu 18 an kah thah hna i adang tampi an kah hliam hna, tiah Hlaing Thar Yar peng sizung ah hliamtong a thloptu sibawi nu nih a Facebook ah a ṭial.

“Sandahpiahtu 2 cu an lu ah an kah hna caah 1 cu a nunnak caah thinphan dai lo asi,” ati.

Fak tukin hliamhmi pawl an thi rih thluahmah kho men, cucaah hnu cun a thimi an karhte kho men.

Yangon nichuahlei South Dagon pengah, kum 15 ngakchia nute telh in minung 3 an kah thah hna. An lu le an paang ah an kah hna.

Zaanlei 6pm ah palek le ralkap nih sandahpiahtu an kah thluahmah hna. Zaanṭim 11pm tiang an kah hna. Minung 50 hrawng an kah hliam hna. 15 cu an nunnak caah thinphan dai lo an si.

Yangon peng dang; Shwepyithar, North Oakkalapa, Insein, Hlaing, Thingyangyun le North Dagon zongah minung 17 an thah hna.

Bago khua ah nu pakhat an thah. An kah thah hnu ah a ruak cu luti horkuang chungah an hlonh ta.

Zingka zongah ralkap duhlonak langhtertu siangngakchia pawl cu ralkap le palek nih an kah hna i tlangval note 1 an kah thah. Adang 3 an hliam hna.

Nizaan zingka ah Kachin state, Hpakan ah kum 30 pa an kah thah i adang 6 an hliam hna.

Zarhpini chun ah Mandalay khuapi ah sandahpiahtu pawl cu ralkap le palek nih an kah hna i nu 1 an thah, adang 6 a hliam hna.

“Sandahpiahtu pawl a kan ṭhenmi si lo, a thah in a kan thah thluahmah. Hi bantukin meithal kuan taktak in khua chungah minung kah thluahmah cu cohlan khawh ding hrim asi lo,” tiah Yangon, Hlaingtharyar pengah sandahpiah vemi pakhat nih a chim.

Yangon, Tamwe peng ah sibawi a kai liomi university siangngakchia pa zong palek sakhan in an kah. Tlu lakin an kah hnu ah palek nih thisen he an hnuh thluahmah. Nu 1 nih bawmh a timh i minu cu an chuih chih, an velh chih i an thah deng hnu ah an tlaih i an kalpi ve. Mipa cu a nunnak caah thinphan dai lo asi.

Pu Ngun San Aung, Dr. Ngun Cung Lian le Pu Khuah Thio te pawl nih hi tluk fihnungmi ralkap an ṭanpi mi hna hi cu khuaruahhar an si ko. An nupile le an fale zong nih zeitin dah an duh hnga, khuaruahhar cu an si ve.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -