Lohtlau: Israel pa nih “Myanmar ralkap nih China hnuchit in Nitlaklei ram he pehtlaihnak ṭha ngeih a duh” ati

Myanmar ralkap nih anmah cawngia tu dingah a hlanmi Canada um Israel pa nih Myanmar ralkap ṭhatnak a cawngia taktak cang.

Nitlaklei ram nih Myanmar ralkap rem hna seh ti ruahchannak in “Myanmar ralkap nih China hnuchit in US le nitlaklei ram he pehtlaihnak ṭha ngeih a duh,” tiah a chim.

Israel ralkap sungṭhoh hlun a simi Ari Ben-Menashe cu Myanmar ralkap nih ramdang media, UN, US le nitlaklei ram pawl sinah an ṭhatnak chimpiak dingin an hlan. Mah pa hi Zimbabwe Prime Minister hlun Robert Mugabe le Sudan ralkap bawi pawl zong nih an rak hlan balmi pa miletiang taktak asi.

“Bangladesh ram ah a zaammi Rohingya pawl zong Myanmar ralkap nih lak a duh hna,” ati.

Ari Ben-Manashe

Ari Ben-Manashe cu Reuters media nih phone an chawnh i, “Myanmar ralkap bawi pawl nih keimah le ka company Dickens & Madson Canada cu US le ramdang nih miṭha lo ah a kan ‘ruah palh’ caah kan chimpiak tiin a kan hlan,” tiah a chim.

“Myanmar ralkap nih China uite si an duh lo. US le Nitlaklei ram pawl he pehtlaih an duh.

“Myanmar khualipi Naypyitaw ka kal i Ralkap cozah Runvennak Vuanci Ralbawi Mya Tun Oo he lungtlinnak sachoh minsen kan thut. US le Nitlaklei ram pawl nih Myanmar ralkap a kan phihkhammi hi an on ahcun tangka cu zat kan in pek lai timi sachoh asi. A zat cu ka chim lai lo. Mah khawh cun South Korea ah ka zuang i atu hi South Korea ka um lio si.

“Rohingya pawl Myanmar ah lak dingin Saudi Arabia le Unite Arab Emirates (UAE) zong kan tonpiak an ka ti.

“A tawifiannak in chim ahcun, Bengali tiin an auhmi hna pawl laknak caah Saudi Arabia le UAE cozah sinah bawmhnak tangka kan halpiak ti khi si.

“2020 November 8 thimnak ah mee diklo tamtuk a um timi cu ralkap cozah nih ṭha tein tatte an piah khawh. Tlangcungmi pawl zong mee thlaknak nawl an pek hna lomi tampi.

“Ralkap nih uknak an chuh hnu in voi 2 tiang Myanmar ka phan cang i buainak zei pipa a um lo. Ralkap duhlo langhternak sandahpiah zong khi Myanmar mipi tam deuh nih cun tha an pe lo.

“Sandahpiahtu pawl cu palek nih an tlangtlak hna. Ralkap hrim an thlah hna lo.

“Ralkap nih ramkhel in chuah thai an duh ko. Nain kum caan tlawmpal laak hmasa an duh,” ati.

A cunglei Israel pa nih a chimmi pawl hi zoh tikah lih lawngte asi. Sandahpiahtu pawl palek lawng nih an tlangtlak hna ti zong lih asi. Ralkap torlecheng an thlah hna.

Sandahpiah hi Myanmar mipi tam deuh nih tha an pe lo a timi zong hi lih lawngte asi.

Israel pa nih hitin US, UN le ramdang pawl ah Myanmar ralkap ṭhatnak a chim peng lai caah ralkap uknak a dotu mipi kan caah a poi taktak. Fak chinchin in tei kan rial a hau tinak asi.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...