Lebanon ah a Puakmi nih Minung 100 Leng a Thah Hna, 4,000 Leng Hliam Tuar

- Advertisement -

Nihnihni ah Lebanon khualipi Beirut ah zei asi ti hngalh lomi ngan taktak in a puak i inn tam taktak a hrawh, minung ting 3 hrawng inn ngei loin a chiah hna, tiah Beirut khuabawi Marwan Abboud nih a chim.

A puakmi cu a pinh tuk ahhin Beirut khua ningpi in a hninh dih cikcek. Innlo a hrawhmi hi tangka in $5 billion man hrawng asi lai, tiah khuabawi nih a chim.

Atutiang hngalh khawh tawk ah minung 113 an thi i 4,000 leng hliam an tuar.

Lebanon President nih tuni ah cozah meeting a auh i “zarh 2 chung poipang dirhmun (state of emergency) kan thanh lai” tiah a chim.

Ram pakhat nih pulrai, kokek rawhralnak, buainak, tbk., fak tuk a ton tikah control khawhnak caah “poipang dirhmun (state of emergency)” a thanh tawn. Poipang dirhmun a thanh ahcun voi dangah onh lomi action a lak khawh i zulhphung a ser khawh.

Mi bawmtu pawl nih a rawkralmi kau in a nungmi an kawl cuahmah hna liopi asi rih caah a thimi le hliam tongmi tampi an karhte kho, tiah ṭuanvo ngeitu cozah zung nih an chim.

Inn ngei lo minung ting 3 hrawng cu cozah le mi bawmtu pawl nih umnak an tuaktan piak cuahmah hna i ti le rawl an pek hna.

Ammonium nitrate

Fiang in an hngal rih lo nain, a puakmi hi “ammonium nitrate” asi, tiah cozah nih an zumh. Liamcia kum 6 ah tilawng pakhat nih a phorhmi non le bomb sernak ammonium nitrate tons 3,000 dengmang cu Beirut cozah nih a tlaih i tilawng dinhnak pawng i kudaung chungah a chiah.

Mah cucu a puakmi si, tiah cozah nih an chim.

Tilawng Dinhnak Rianṭuan Pawl Inn Thong an Thlak Hna Lai

A puakmi hi aho palh dah si ti hlathlainak kan tuah lai i aphi chuah hlan chung paoh cu, tilawng dinhnak rianṭuan lutlai dihlak an inn cio ah thong kan thlak hna lai, tiah Lebanon cozah nih bia a khiah.

France President nih mi bawmtu he Lebanon kan tlawng lai a ti

France President Emmanuel Macron nih, “vanlawng 2 khat in mi bawmtu pawl le bawmhnak pawl he Beirut ah ka zuang lai,” tiah a thanh.

France cozah nih Lebanon cozah kan ton lai i hartong kan bawmh hna lai, tiah AP tadinca ah a chim.

Lebanon ram cu hlan lio ah France nih a rak ukmi asi i atu zongah an ram 2 cozah pehtlaihnak le chawleh pehtlaihnak a ṭha ngai.

Europe Ramkawmh (EU) nih, “a rannak in meithat 100 leng le meithahnak mawṭaw, a rawkralmi nih a nenhmi pawl kawltu dingah rim hnimh thiam uico le thilri kan kuat hna lai,” tiah a thanh.

Czech Republic, France, Germany, Greece, Poland le Netherlands nih hartong bawmh dingin thawng an thanh cang. Ramdang zong nih an zuanhnawh zau hna lai tiah zumh asi.

Follow US

102,149FansLike
53FollowersFollow
731SubscribersSubscribe

Ṭial Tharmi

Malaysia ah Covid-19 mizaw thar 111 an hmuhchap hna

Tuni Malaysia ram ah Covid-19 zawtnak ngeimi 111 an hmuhchap hna. Zarh khat chungah mizaw a zaleng an hmuh hna hi voi...

Hakha University ah ni 14 chung khumherhmi minung 12 cu an ttinter cang hna

Chin state Covid-19 dohnak bu hruainak in Hakha khua chungah a rak lutmi paoh cu Hakha University ah ni 14 chung khumherh...

Malaysia biaceih zung nih kum 5 a fa pate a that tu nu le a tlangval pa thihdan a pek hna

Tuni ah Penang High Court nih kum 5 a fa pate a rak thattu hringtu nu le a tlangval pa cu hri...

Myanmar National Team ah ai tel mi Valte

Valte hi Kalymyo um Falam mi a si. 2010 kum ah Kalaymyo certual ah kan i hmu. Cu...
- Advertisement -