Hmai thla, May ah degree a la ding Ngun Cer Chin @Mimi cu harnak tampi pah in US Navy ralkap university kum 4nak a kai liomi, nusal asi.
May thla ah US Navy ralkap degree a lak cangka in Maryland um US ralkap sibawi university Uniformed Services University of Health Sciences ah sibawi kai rih aa tim.
Mimi cu kum 8 asi lio, kum 2006 ah a naunu le anu he Malaysia an phan. 2008 ah UNHCR bawmhnak in US ram, Florida state, Jacksonville khuapi an phan.
Kum 1 an um hnu ah Maryland state, Savage khua ah an i ṭhial.
Mimi cu middle school a kai lio ah, sunghno anu lung cancer zawtnak a ngei i chemotherapy in thlop hau dirhmun tiang a rak phan.
“Ka nu cu voi dang bantuk asi ti lo. Ka zoh ah ka celh lo. A caah zei paoh tuah ka ngamh.
“Ka naunu he kan si khawh chungin ka nu cu chemotherapy in kan thlop ter. A donghnak bik thlop dingin kan kal lio ah a tlu. Tlawmpal ah a nunnak liam. Sii tamtuk a dinnak le chemotherapy in an thlopnak ah a thluak thahri rawk i a nunnak liam cu si.
“Ka nu caah zeihmanh ka rak tuah kho lo. Sibawi sining law a fah daihnak ah zeital ka tuahpiak khawh hnga ti ka rak ruat.
“Mah lio cun sibawi si dingin kaa sungphiat. Midang hi, keimah bantukin a cuzat hlan ah an dawtmi minung nih an liamtaknak hnga lo bawmh ka duh hna.
“Cun, US nih dawtnak tein a kan lak caah keimah he ka chungkhar he kan i lawm tuk. US caah thilṭha tuah ve dingin ralkap ṭuan zong ka duh. Mah ruangah High School kum 1nak ka kai ah ralkap kong cawnnak ROTC program ah ka lut ve.
“JROTC ka luh hnu ah, Navy ralkap university kong ka theih i ralkap kong chimtu ralkap bawi hlun Lt. Col. Patricia Marhsall ka ton,” tiah a chim.
Marshall nih, “Mimi cu ka fanu bantukin ka ruah. ROTC ah kum tlawmpal a kai chungah, a tuanbia aa ka chimh. A tonmi pawl ka ruah ah ka khuaruah lei har. Nusal, nu lungṭhawng taktak asi,” tiah a chim.
Mimi cu high school a dih in UN Navy sianghleirun (United Nations Naval Academy – USNA) ah a kai colh i sii major a la colh.
“USNA ah ka hmuhton hmasa cemmi cu ruhkhua a rawkmi remh (orthopedics) asi. Ka uar tuk. Aa hliammi ti ralkap pawl sibawi sinah an hung i piah i an chuah lei cun an mithmai a panhmi ka hmuh. Mah nih cun thazaang aa ka pek tuk i mah lei cu cawn thai dingin kai sungphiat,” ati.
USNA ah sii lei chimtu a simi professor Dr. Brian Rehill nih, “Mimi cu nusal taktak asi. Thil har taktakmi chungah thil har taktak a cawng,” tiah a thangṭhat.
Mimi cu US Navy Ralkap University ah mark ṭha ngai in a awn caah May thla ah degree a lak khawh cun ralkap sibawi university Uniformed Services University of Health Sciences ah sibawi tling peh dingin an thim ve. Kum 2021 ah USNA in degree a lami vialte lakah minung 12 lawng an thim hna i aa tel ve.
Mimi nih, “Sibawi kai lim cangka in, kum 20 chung ralkap sibawi ka ṭuan colh lai. Mah nak sau deuh zong ka ṭuan te kho men,” tiah a chim.
Mimi cu a sianghleiruun a kaimi pinah, Midshipmen Action Group zongah lutlai asi. Maryland state khualipi Annapolis um St. Mary’s High School ah ramdangin US a rami pawl, Mirang holh a thiam rih lomi pawl zaanghleicawi in Mirangca a chim pah hna.
“Kei zong US ka phak ka ah Mirang holh ka rak thiam ve lo. Atu cun keimah dirhmun bantuk a si vemi hna Mirang holh ka chimh khawh hna caah kaa lawm tuk,” ati.
Cun, Mimi cu USNA kum 2nak a kai lio ah, high school a rak kai lio i ralkap saya Marshall nih biachim dingin a sawm caah Howard High School ah a kir i ralkap tinṭan a kaimi pawl cu a tuanbia a chimh hna.
Marshall nih, “Mimi cu nu hme asi caah zei huaha lo ah a ruatmi an um kho men. Nain, stage cung kai in a tuanbia le a tonmi kong a chim ciammaam cu patling pipi mitthli he an ṭap dih,” tiah a chim.
US ram ahcun, kum 4 chung kaimi US Navy ralkap sianghleiruun (USNA) in degree ngah ahcun direct in ralkap rank pek an si cang. Mimi cu hmai thla ah degree a lak cangka in ralkap rank he ralkap sibawi university Uniformed Services University of Health Sciences ah sibawi a kai rih lai.
“Tinhmi ngeih ahcun, midang nih zei an ti len zongah phak khawh asi ko. Pathian nih, harnak ka tonmi vialte tuar khawhnak thazaang aa ka pek caah le ka saduhthah le chunmang vialte tlinh kho dingin aa ka bawmh caah ka lawm,” tiah Mimi nih a chim.
Mimi lawmhpinak caah le na dawtmi hna thazaang peknak caah share ve.
