American pop hlasa minthang Lady Gaga nih kum 19 ka rak si lio ah tlaihhrem ka tong i nau ka rak pawi tiah a phuan.
Kum 35 simi Lady Gaga cu Britain siangpahrang fapa Harry chuahmi ‘The Me You Can’t See’ documentary series i episode 1nk ah an sawm i atu bantuk in a chim hi a si.
Mah series cu May 21 ah Apple TV+ ah thlah a si i minthang pawl nih an rak tonmi harsetnak kong chimphuannak kong a si.
“Kum 19 ka rak si lio ah ka rianttuannak i producer pa nih ‘Na Thil I Phoih’ a rak ka ti,” tiah Gaga nih biaruahtu (caan tlaitu) Oprah Winfrey sinah a chim.
“Ka duh lo ka ti i ka kal. Mah ahcun ka hla vialte kan in khangh piak dih lai an ka ti.
“An ngol hlei lo. Na thil i phoih an ka ti peng. Ka ar ko… atu ahcun thil sining dikhlek tein kaa cinken ti lo,” tiah Gaga nih a mitthli ha mang he a chim.
Lady Gaga hi a min taktak ah Stefani Germanotta ti a si. Producer pa min cu a chim duh lo.
“#MeToo cawlcanghnak hi ka theihthiam tuk. Cun, mi cheukhat cu mah kongah an siaremtukmi ka hmuh, nain kei cu ka um sawhsawh kho lo.
“Mah bantuk hi midang nih an ton ve ding ka duh piak hna lo. Hi bantuk hi a chiakha tuk i tih a nung tuk,” tiah Gaga nih a chimchap.
Gaga nih 2014 December ahkhan The Howard Stern Show ah tlaihhrem a rak tonnak kong cu mizapi theih in a rak chim bal cang.
“Studio chungah a thla in an ka hren. A ka tlaihhrem i nau a ka pawi tertu pa nih ka nulepa inn kam tiang a rak ka chiahmi kong ka ruah hin atu tiang ka lungfak peng,” tiah Gaga nih a chim.
Gaga cu sizung tiang a rak phan i pumsa lei cawnghhramh lawng siloin ruahnak (mental) sibawi tiang nih rak zohkhenh a si.
“Kum 2 le cheu hnu lawngah lung tthawng in mi sin ka chuak ngam,” tiah Gaga nih a chim.
