Ku Hye Sun le a va an i tthen kho men

Ku Hye Sun le a va an i tthen kho men

South Korea actress Ku Hye Sun nih a vapa he ca an i kuatnak hmanthlak cu nizaan ahkhan social media ah a hun tar i, an i tthen tiin online ah thawngpang a thang.

Ku Hye Sun le a va Ahn Jae Hyun cu ‘Blood’ drama series an thlak ttinak in aa duhmi an si i 2016 May thla ahkhan tthitumnak an rak tuah.

Ku Hye Sun nih a va he ca an i kuatnak pawl cu a duhnak zawn tete a tan i social media ah a tar. An cakuat zoh tikah a va Ahn Jae Hyun (kum 32) nih i tthen a duh.

Anh Jae Hyun nih hmai zarh hrawng ah i ruah lo tukmi thawngpang cu mipi sinah thanh a timh i Ku Hye Sun nih a duh lo caah i thok dawh a si.

Ku Hye Sun nih a va Ahn he hringtu a nu cu mithring in ton a duh nain Ahn nih phone lawngin chawnh a duh ve.

“I umh na duh ruangah ka nu na rak lem/lor bantuk khan kan i tthen nak ding zong hi lem/lor hen. Kan i umh lio i na biakam pawl na tlinh khawh lo mi kongah ka nu cu na pum/mithring in tong law ngaihthiam hal. Ka rian biapi tuk na ti, ka nu nak in na rian biapi deuh na ti ahcun ka um sawhsawh ti lai lo” tiin Ku Hye Sun nih cakuat hmanthlak a tar.

Ku Hye Sun nih hmanthlak a tarmi cung ah “kan cakuat hmanthlak ka tarmi cu ka nu nih a hmuh ve i a lau tuk. A zawt. Ka lungtha lo” tiah ca a ttial.

Ku Hye Sun nih a hnu ah Instagram i a tarmi hmanthlak cu a hlonh tthan.

Ku Hye Sun le Ahn Jae Hyung agency simi HB Entertainment company nih catluan a chuah colh ve.

“Pumpak kong le thil sining tampi ruangah fak piin bia an i al hnu ah Ku Hye Sun le Ahn Jae Hyung nih i tthen dingin an lungtling. An agency sinak in an pahnih biachahmi cu kan upatpiak hna i hmailei ah nuam tein khua an sa veve lai tiah kan ruahchan piak hna.”

“Ku Hye Sun nih naite ahkhan sihni aa hlan i biaceih zung ap ding ah tthennak ca an tawlrel. Ca cu a va sin ah an kuat ve i a va zong nih sihni aa hlan colh ve. Ku Hye Sun nih cun August thla chungah tthennak ca cu biaceih zung ah phan seh law, September thla ahkhin i lim seh ti a duh,” tiah HB Entertainment company nih catluan a chuah.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.