Myanmar ralkap nih February 1 ah Aung San Suu Kyi party NLD uknak a chuh thokin a kap pengmi Karen hriamtlai phu KNU nih, “Suu Kyi nih ka palh ti aa fiang cang lai,” tiah a chim.
Karen state, Papun pengkulh um ralkap sakhan pawl cu KNU nih a tuk chuh hna i tirawl zong kua kho loin a kham hna caah ralkap nih vanlawng in a kah beh hna i khuami 3,000 hrawng nih Thailand ramri ah an inn an zaamtak.
Ralkap thazaang in a doh pinah, KNU cu mipi thimmi MP pawl (CRPH) he federal ram dirh dingin biaruahnak an ngei cuahmah.
KNU ralkapbu 5 biachimtu Padoh Mahn Mahn cu The Irrawaddy nih bia a hal.
The Irrawaddy: Daw Aung San Suu Kyi an thlah cun CRPH nih hriamtlai phu bia a kan kamhmi hi a tuah taktak lai lo tiin hriamtlai phu pawl an thinphang tiah kan theih. Asi tak maw?
KNU ralbawi Padoh Mahn Mahn: Pi Aung San Suu Kyi nih 2008 Phunghram a remh lai tiah minung tampi nih kan i ruahchan. Nain kum 5 chungah zeihmanh a remh kho lo.
Mah nakin a poi deuhmi cu, NLD acozah cu ralkap he i rem lawng aa zuam. Miphun hriamtlai phu pawl hnu a kan chit pinah harnak a kan petu policy pawl a ser. Mah policy pawl nih cun atutiang harnak a kan pek peng.
Sinain, atu lio ramkhel boruak ahhin, CRPH nih federal phunghram ser aa zuam taktak ko ahcun, zeihmanh thinphan awk kan ngei lo.
Pi Aung San Suu Kyi nih ‘ralkap ka thlen khawh lai tiin ka rak ruahmi kha ka palh i rammi lungrualnak ka tuah kho lo’ ti zong atu cun aa fiang ko cang lai. Kan thinphan zongah kan mawh lo, nain atu cu Pi Aung San Suu Kyi a lungfim cang lai ti kan zumh.
