Ralkap nih buai lo tein sandahpiahmi mipi pawl cu meithal in a tlerhmi hna hi democracy phung he aa kalh i a pehzulh peng ko ahcun mipi cu kan ven hna lai, tiah Kachin Independence Army (KIA) biachimtu ralbawi Naw Bo nih a chim.
“KIA cu mipi lei ah a dirmi bu a si i ralkap nih meithal in a tlerh peng ko hna ahcun lam pa khatkhat in kan i thlak lai,” tiah ralbawi Naw Bo nih a chim.
Nizaan ahkhan Kachin state, Myitkyina khua ah sandahpiahmi mipi pawl cu ralkap le palek nih meithal in an kah hna caah minung 2 nunnak a liam. Hliam tongmi zong an um len.
Mah kongah, ralbawi Naw Bo nih hitin a chimmi a si.
Atu hi KIA le Kawl ralkap cu Shan state chaklei, Muse khua ah nifatin ngawt in an i kap.
Mipi thimmi MP pawl nih an dirhmi CRPH he tonnak kan ngei rih lo, tiah ralbawi Naw Bo nih a chim.
Ralkap uknak duh lo langhter in sandahpiahmi mipi pawl cu ralkap le palek nih meithal in an kah lengmang hna ruangah KNU, TNLA nih cun an mipi pawl an ven hna. – RFA
