KIA ralbawi Gwan Maw: Naypyitaw, Yangon le Mandalay ah thahnawnnak tuah kan timlo

KIA ralbawi Gwan Maw: Naypyitaw, Yangon le Mandalay ah thahnawnnak tuah kan timlo

“Kawlram khuapi 3 ah tlangcungmi hriamtlai phu pawl nih kahdohnak an tuah hnik timi cu a dik lomi thawngpang a si,” tiah KIA ralbawi Gwan Maw nih a Facebook cahmai ah a ttial.

CNF, KIA, KNU le AA nih September 16 silole 26, October 16, 26 ah Naypyitaw, Yangon le Mandalay khuapi ah bomb puah an timh tiin president office sin in kan theih tiah Ramchung Vuanci Zung nih thawng a thanh.

Mah thawngpang ruangah US, British, Canada le Australia tanzung pawl nih ralrin peknak cathluan an chuah colh ve.

Ralrin peknak a chuah hnu in cozah nih Mandalay khua luhchuahnak, Central Point shopping mall, Mahamuni Pagoda, Park le Cinema zung pawl ah bomb an kawl.

Tuni tthiamtthiam ahkhan Naypyitaw i market pawl le mi an tamnak hmun pawl ah palek tampi an thlah hna.

“Facebook ah ralrin peknak thawngpang an hmuh ruangah an thinphang i cheukhat cu tuni dawr a ong ngam lo,” tiah Naypyitaw um dawr ngeitu pakhat nih a chim.

US, Canada, British le Australia tanzung nih an rammi pawl cu ral a umnak Rakhine, Chin, Shan state, Mandalay ramtthen, Yangon le Naypyitaw khuapi pawl ah a herh tuk lo ahcun tlawng lo dingin ralrin a pek hna. – The Irrawaddy

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.