Kachin Luatnak Ralkap (KIA) nih zahan zaanlei ah Kachin state, Mogaung pengah mawṭaw in a rami Myanmar ralkap a kah hna.
KIA nih, “Cunglei ralkap nih kanmah doh dingin ralkap tam deuh a hung thlahmi pawl kan kahmi hna si,” tiah a chim.
KIA biachimtu Naw Bu nih, “Ralkap phortu 2 cu Loili Yang khuate pawngah vawlei hmenhmi bomb in kan puah hna,” tiah a chim.
“Myanmar ralkap nih zeitin dah ralkap a thlah hna i tirawl a kuat hna ti hi ṭha tein kan ngiat. Kanmah doh dingin ralkap tam deuh le hriamnam tam deuh a kuat hna ahcun kan ṭhuat hna. Anmah nih a kan ṭhuat hlan ah kan ṭhuat hmasa hna hau,” ati.
Ralkap pawl zeizat dah an thi timi a dikthlir cu ka hngal kho ve rih lo, ati. KIA nih ralkap le hriamnam an tlaih hna timi thawngpang cu a fehter lo.
Khuami pakhat nih, “Nilini zaanlei ah a puakmi thawng thangpi ka theih. Meithal puah thawng voi 10 hrawng zong ka theih,” tiah a chim.
“Bomb a puahnak hmun cu tu zingka ah kan zoh. Inn cheukhat cu meithal kuan nih a khen nain khuami hliam tong cu an um lo,” ati.
KIA nih uknak firtu Myanmar ralkap cu a cohlang lo i, March 11 thokin Kachin state pumpi le Shan tate chaklei ah an i kap peng.
KIA nih ralkap le palek sakhan pawl a kah hna i “rampumpi ah sandahpiahtu mipi na kah peng hna ahcun hi nak fak deuh in kan in kah lai” tiin ralkap cu a tlerh.
Mah ruangah, Myanmar ralkap nih Kachin state, Tanai peng le Shan state, Namtu pengah um KIA ralkapbu 11 le 14 cu vanlawng in a kah hna.
Zahan zaan ahkhan Myanmar ralkap nih miakpi in KIA sakhan lubik Laiza pawng cu voi 10 hrawng a kah. Hliam tongmi cu an um lo.
Naw Bu nih, “Nai hrawng cu Laiza sakhan pawngah ruahdamh in a kan kah lengmang. Ralrin peknak caah a kan kahmi si sehlaw alo,” tiah a chim. — The Irrawaddy
