Nai hrawng khuate lei buaibai ruangah Thantlang ah a hung zaammi tampi nan um nain COVID-19 i check hnu ah a thian lawngah kir a ngah caah cheukhat harsatnak nan tong.
“Thantlang Humanitarian Response Team (THRT) phone number 09262949374 le 09425005158 ah kan chawn ulaw COVID-19 i check man kan in liampiak hna lai,” tiah THRT nih thawng a thanh.
“Nai check hnu ah COVID-19 zawtnak na ngeih sual ahcun thlopnak man zong kan si khawh tawk in kan bawmh hna lai,” ati.
THRT thawngthanh
Kan hnu lei buaibai ruangah khua te lei in Thantlang khua chungah a rak kan fuh panhmi mi tampi nan um hna. THRT nih kan si khawh tawk in bawmh khawhnak lam kan kawl lai kan ti nain, COVID nih a kan tlak buat caah kan in bawm kho hna lo.
Cheukhat cu khua lei ah a kir cang mi zong nan um bantukin atu tiang hika hmun ah a thu to mi nan um rih ti thawng kan theih. Cazin tha tein kan la ti lo. Aruang cu COVID kong ah I ralrin paoh a tha tiin leng chuah lo kan I zuam cio hna.
Tu hnu ah cheukhat cu khua lei ah kir a duh ko nain COVID I check I negative a si lawng ah kir a ngah tibantuk hna a um cang tikah COVID check kong ah harsatnak tete a um pah.
Cucaah khua te lei in a rak I dor mi le khua te lei ah kir a duh I COVID ai check mi hna nih THRT sinah nan min cazin nan kan pek ahcun check man kan in liam piak hna lai. Positive na si sual ahcun sii-ai man zong kan si khawh tawk in bawmh khawh kan in zuam hna lai.
Pehtlaih khawhnak,
09262949374
09425005158
