Khuaci an mui: Australia meikang nih minung 23 a thah cang hna, PM nih ralkap a thlah hna

- Advertisement -
  • Australia ram cu ṭhal nilin ruangah September thla in atutiang ramlak ah meikang 200 leng an chuak
  • rampumpi ah minung 23 a thah cang hna, adang 6 an tlau.
  • Inn 1,500 leng a kangh cang. Minung ‘ting’ tampi an zaam.
  • Saram 480 million leng an thi cang. A karh thluahmah rih lai tiah zumh asi.
  • Australia cozah nih meithahnak caah tangka $20 million le i chiahmi ralkap 3,000 a hman
  • Australia ralkap tilawng nganbik HMAS Adelaide zong a hman
  • Vanlawng le helicopter tampi in ti an thlak len nain mei an that kho lo
  • Chinmi nih bawm ve hna usih

A tlaumi 6 cu New South Wales le Victoria state i meikang a umnak hmun ah khuasami an si.

Tuni ah, Australia cozah hruaitu Prime Minister Pu Scott Morrison nih, “meikang nih a khammi Victoria state i rili kam khua pawl ah minung va khamh dingin Australia ralkap tilawng nganbik ‘HMAS Adelaide ka thlah lai,” tiah thawng a thanh.

“I chiahmi ralkap (reserve) 3,000 zong meikang nih a hrawhmi remh bawm dingin ka auh (thlah) hna lai. Ti thlaknak vanlawng dang 4 hlan chapnak caah cozah tangka $20 milion kan hman lai,” ati.

Australia ralkap tilawng HMAS Adelaide nih Victoria state i rili kam khuate pawl ah meikang hartong a va khamh hna lai

Australia ram chung meithahnak vanlawng nganbik Boeing 737 le adang vanlawng le helicopter pawl in ti an thlak len nain an that kho lo.

‘Ramlak meikang a chuahka ah nan zohsawh’ tiin Pu Scott Morrison acozah cu mipi nih an soisel ngaingai. Meikang hartong cheukhat lebang cu cozah cungah an lungfak ngai.

Meikang 200 leng cu thli fakpi nih khat lei in khat lei ah a hranh lengmang hna pinah, atu hi Australia ram cu ‘ṭhal caan’ asi caah nilin 40C leng tiang a phan i hmun tampi ah khuakhen a chuah caah ramlak burbuk an rocar dih.

Mah ruangah meikaang 200 leng cu an kangh ning a fak tuk i anmah tein ‘khuacaan’ an i ser, van ah meikhu chah taktak in khuadawm an i ser i nimtlau le ṭek tiang an tlaker, i meikang thar a chuak ṭhan lengmang.

New South Wales state Lamsual Vuanci Pu Andrew Constance lebang nih cun, “hi cu ramlak meikang asi ti lo, atom bomb asi cang,” tiah ABC radio ah a chim.

Kangaroo Island um vanlawng hme mongtu Pu Dick Lang, kum 78 le a fapa Clayton, kum 43 (plastic surgeon) cu nunnak kawl in an zaam lio highway lam chungah mei nih a kangh hna. An ruak cu highway cung i mei kanghmi motor chungah an hmuh.

“Khuaci kan mui ko,” tiah Kangoroo Island khuabawi Pu Michael Pengilly nih ABC media ah a chim. Chaklei rili kam lebang cu nuclear bomb nih dara a den ti awk in a um. Atu lio cun mei hi thah khawh ding asi lo, thah khawh ding asi naisai lo, ati.

Australia ram chungah minung an tambiknak state 2 NSW le Victoria nichuahlei rili kam thluangthluan vialte cu thah khawh lomi mei ngan taktak nih a rawh dih i inn 1,500 leng a kangh cang pinah minung 23 nunnak a lak cang. A karh thluahmah rih lai tiah zumh asi.

Ram pumpi ah minung a tingting cu an inn in an ṭhial cang hna.

NSW Khuate Mei Thahnak Zung bawi Shane Fitzsimmons nih tuni ah, “kan state chungah atu hi meikang 148 an um. Mah chungah 12 cu emergency warning pek ding level tiang an phan,” tiah a chim.

Victoria state Emergency Management bawi Andrew Crisp nih, “kan state chungah meikang 53 an um, tam deuh cu kan state nichuahlei ah an um hna. Meikang 13 cu emergency warning pek ding level tiang an phan,” ati ve.

State dang 3; Tasmania, South Australia le Western Australia hna zongah meikang an chuak len ve i meithat pawl an buai ngai ve.

Kum 20 leng a rak kang bal lomi tupi tampi zong an kang thluahmah. Meikang cheukhat cu pe 130 tiang an sang.

NSW state i minung 300 hrawng an umnak ‘Adaminaby’ khuate lebang ahcun tu chun ahkhan meikhu ruangah van a nak dih cikcek. Chaklei le nitlaklei in mei nih khua kangh an timh cang caah zaanghleicawi khuami nih mei an thah thluahmah lio asi, mah lak cun van in nawncek, hnawm le vutcam cu ruahpi sur in an sur thluahmah.

“Khua inn kangh hlah seh tiin zaanghleicawi khuami nih a zarh zarh in kan ven cang,” tiah meithat pakhat nih a chim.

Australia khualipi Canberra le Sydney khuapi hrianglei Penrith ahcun kum 80 chungah nilin fak bik an tong, 44C a phan.

Chinmi nih bawm ve hna usih

Australia Zaanghleicawi Meithat (The Trustee for Volunteer Fire Brigades Victoria Welfare Fund) cu Chinmi nih kan si khawh tawk in bawm ve hna usih, tiin Victoria state khualipi Melbourne um Pu Sang Hre nih Gofundme ah bawmhhalnak a tuah i atutiang ah $3,000 an hlut cang.

Australia um Chinmi tam deuh cu Australia mipi tangka (Centrelink bawmhnak) ei lawng kan tthawng i an ram mipi caah san kan tlaihnak a um lo.

Hi bantuk vanchiatnak ton lio tal ahcun kan si khawh chungin bawm cio hna usih. Khrihfabu pawl zong nih meikang hartong pawl cu dollar thong tampi in bawmh ding an si. Hi bantuk caan tal ah kan bawmh ve hna lo ahcun ngaihchia ngai kan si lai.

Mah hi hmet law Gofundme ah na si khawh tawk rak thawh ve.

Ṭial Tharmi

Kalaymyo ah Quarantine lutmi minung 7 tazacuai an tong

Sagaing ramtthen, Kalaymyo ah Quarantine Center ah a lutmi minung 7 cu zuu an ding i sianginn kutka an hrawh caah ram...

Malaysia Covid-19 mizaw thar 95, a thimi 1

Tuni September 18 ah Malaysia ram ah Covid-19 mizaw 95 an hmuhchap hna i zawtnak ngei hmuhmi dihlak 10,147 an si cang.

Pastor Te Soiselnak Sawhsawh a Lo Nain | Salai Bawi Lian Mang

BIA KAA-KHAT | By Salai Bawi Lian Mang (Note: Mah ca hi 2005 May thla ah Lai Forum ah...

Nazareth Khua ah Minung 2 Meithal Kah in an Thi

Judah (Israel) ram Nazareth khua ah zahan zaan ah meithal kahnak a chuak i pa pahnih an thi, tiah Israel media pawl...
- Advertisement -