Khrihfa ralrin kan hau: Ralkap nih Kachin biakinn an luhhnawh

- Advertisement -

Uknak firtu Myanmar ralkap cozah nih “phungninglo thil nan tuah” tiin Kachin state, Mohnyin peng um khrihfa biakinn 3 an luhhnawh i ralkap duhlonak tehte an kawl.

Zarhteni ah Kachin khrihfa biakinn an luhhnawhmi 3 cu; Kachin Baptist Convention (KBC), Roman Catholic Association le Anglican Association biakinn an si.

KBC pastor Rev. Awng Seng nih, “An luhhnawh sawhsawhmi si lo. An thlok dih cikcek. Biakinn area hruang an kai i area chung um inn vialte an thlok dih. Ralkap bawi pakhat cu kan inn kutka hraam ah a ra i bia kaa khat hmanh a chim lo, inn chungah daireck a lut i a thlok dih,” tiah a chim.

“Ralkap nih cun ‘sandahpiah hruaitu nan biakinn ah a um i biaknak hruaitu pawl sandah an piah ve tiin cunglei nih thawng an kan thanh’ ti lawng an chim.

“Hnawmpung tiang an thlok dih,” tiah pastor nih a chim.

“Mah hi cu Khrihfa cawnpiaknak i hrawmnak biaknak hmun asi. Kawl an duh ahcun biaknak hruaitu pawl sinah nawl an hal hmasa awk si. Hriamnam he ralkap nih mah nawl in biakinn an luhhnawh i an thlok dihmi hi cu ral hlah maw an doh ti awk in. Cohlan khawh ding asi lo caah fak piin ka pom lonak ka langhter. Biaknak hmun hmanh hitin an tuah ahcun, mipi inn chinchin ahcun zeitin dek an um lai. Khuazei hmanh a him ti lo,” tiah Rev. Awng Seng nnih a chim.

Ralkap nih biakinn 3 an thlokmi cu zeihmanh an hmu lo tiah theih asi.

Roman Catholic Association chungtel pakhat nih, “Zeizong vialte an thlok dih. Ralkap duhlo langhtertu pawl an kawl fawn hna. Kan motocycle tiang an thlok dih,” tiah a chim.

March 13 zong ahkhan, Kachin khualipi Myitkyina um Kachin Theological College and Seminary (Nawng Nang) cu ralkap nih an thlok dih.

KBC tu cu ralkap nih an biakinn thloknak nawl an hal hmasa hna.

KBC president Dr. Hkalam Samson nih, “Biaknak lei hruaitu pawl cu biadik a chim zungzalmi kan si. Buddhists, Hindu le Muslim zong mah ṭhiam. Biaktak a chim zungzalmi biaknak inn pawl hitin thlok cu tuksapur bak asi,” tiah a chim.

“A herh lomi hriamnam torlecheng he ralkap thlah in biakinn thlokter cu hremuknak hmelchunhnak asi. Biaknak hmun pawal cu hmun thianghlim an si. Pathian cu chim hmanh hau lo. Hmun thianghlim ah ralkap keden le meithal he thlanglamhnak tuah phung asi lo,” ati.

March 1 zongah, Shan state Lashio um KBC biakinn cu ralkap nih an baoh i biaknak hruaitu 10 leng ni 2 chung an tlaih hren hna. Biakinn area lei a zaammi sandahpiahtu pawl an kawl hna i biakinn chungah meithal hna an puah.

Biakinn 429 le member ting 4 leng (Chin state milu zat deng) a ngeimi KBC cu Kachin ramkhel le zatlang kongah a biapi taktakmi asi.

KBC nih “ralkap cozah kan duh lo” ati i ni fatin federal democracy le tlukruannak caah thlacamnak a tuah peng. — Irrawaddy

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...

US le NATO nih Ukraine sinah ral tuknak vanlawng kuat an timh

US le NATO nih Ukraine sinah ral tuknak vanlawng kuat dingin khua an khan liopi asi.US Ramdang Vuanci...