‘Khrihfa nih lungrual in Joe Biden caah thlacam hna usih,’ Billy Graham fapa Franklin Graham

AMERICAN, Christian _ US. tuanbia ah a hnokhnai ngaimi caan ah hin Khrihfa nih lungrual in kan zate tthatnak caah thla kan cam awk a si a ti.

Thim tlin a simi US president le vice president ca ah hin thlacam ko hna usih tiah forhfial bia a chim.

Trump dirpi ngaitu Graham nih, “Civil War thokin kan ram thencheunak hi a lianngan hringhran. Cucaah, president le vice president caah le party pahnih ram hruainak caah hin Khrihfa nih thla kan cam a hau,” a ti.

“Party Khat le khat sual i phawt in kutdong i sawhnak hi an ngol khawh i kan ram caah tuanvo kan ngei veve ti thei in rian an tuanti khawh naklai thlacam ko hna usih.”

Graham biachimmi cu Congress nih Biden a tling ti an thanh bak khan a si i, suimilam pakhat chungah comment 40,000 a lut.

Cu chungah pakhat cu, “Na chimmi hi a dik. An caah thla ka cam lai,” likes 10,000 a hmuh.

Pakhat nih, “Anmah he i pehtlaih ding le tlaih lo ding cu kai fiang rih lo. Sualnak le that lonak hi kan doh awk a si lo maw? Atu cu that lonak nih a tei. Thla ka campiak hna cu a herh ko. Ka dawt hna zong a herh. Asinain, anmah he lung khat um ding cun fial ka si lo,” a ti.

A dang pakhat nih, “Biden le Harris caah thla ka cam a si cun an lungfimnak, an mit an i au khawhnak caah a si lai. Sualnak kha an dirpi, an hruainak ka duh lo. Pathian hi nihsawh in a um lai lo,” a ti.

A donghnak bik comment an lakpiakmi cu, “Kan ruahmi ai khat ko. Kum 4 chung i party pahnih an i ti ning hi a chiakha ngai. Atu cu aho poh kan caah kan ram le hruaitu hi kan lungfim caan, kan tuanti caan a si cang.”

CHRISTIAN HEADLINES