“Tu kum thok ka in atu tiangah Kelantan state i hmun 337 ah tlaihkhihnak kan tuah i phungninglo ramdangmi 930 kan tlaih cang hna,” tiah Kelantan state lahwahkah bawi Siti Khadijah Hamzah nih a chim.
“Kan tlaihmi hna cu Bangladesh rammi 290, Myanmar rammi 243 le Indonesia rammi 153 hna an si.”
“Cun, Malaysia lahwahkah nih August 1 in December 31 tiang tuah timhmi ‘Back for Good’ in an ram ah tlun a duh i kanmah sin (Kelantan state lahwahkah zung) a rak sokmi 97 an um.”
“An ram kir dingin form a rak apmi pawl cu Bangladesh, Pakistan le Indonesia hna an si.”
“Malaysia ram ah a ummi anmah ram tanzung cio ah passport le a herhmi cahnah pawl lak dingin kan fial hna. Cun, lahwahkah zung an rat ah an ram tlunnak vanlawng ticket le dantatman RM700 i put chih ding in kan chimh fawn hna. An i lim dih hnu ni 7 chung ah an ram ah an tlung lai,” tiah Siti Khadijah nih a chimchap.
Malaysia cozah nih tu kum thok in khan atu tiang, nifatin ti awk in ramchung ah tlaihkhihnak a tuah i phungninglo ramdangmi a thongthong in a tlaih cang hna. Phungninglo ramdangmi tam deuh cu passport nithla a dih tiang a ummi le phungninglo in Malaysia ram ah a rak lutmi (zei catlap hmanh ngei lomi) an si hna.
Tlaihkhihnak cu lahwahkah le palek i bawm in rianttuannak hmun (rawldawr, innsaknak, sehzung, tbk,.), tlangtlawng station, bus station le minung umnak inn pawl ah an tuah.
An i tinhmi cu an ramchung ah phungninglo minung zorter kha si.
Malaysia ram ah phungninglo in a ummi tambik hi Indonesia, Vietnam, Bangladesh, Nepal le Myanmar hna an si.
