Kawlram Tlun Bawmhnak UN Zung Ah Nan Halmi Khi A Phu Lo

Malaysia Chinmi Bawmh Loin An Thi Dawp Aa Timmi Upa An Um

Atu tiangah Kawlram kirthannak kan bawm ko uh tiah UN zung ah bawmhnak a halmi Laimi lawngte Minung 20 hrawng an um cang. Mah Laimi minung 20 hna hi UN nih an tlung kho tak hnga maw, tlung hna sehlaw an him tak hnga maw timi theih duhnak ah siorawl tarh in tarh awkah tlunnak bawmh a halmi hna chungin a thimmi hna an si tiah ti khawh an si…

Bawmhnak hal hi a phu maw, phu lo;
Bawmhnak nan halmi ahkhin zung nih a zeizong tein an kan bawmh/tuahpiak dih lai tiah i ruah lo ding. Zung nih an kan tlunter colh lai i Kawlram kan phan lai tiah nan i ruah sual lai.
Laimi kan ram ah kirthannak kongah Zung nih Kawl cozah sinah siseh, Malaysia Kawlram tanzung ah siseh, Malaysia lahwahkah zung zongah siseh, chim le relpiaknak an tuahmi zeihmanh a um lo.

Cucaah, theih dingmi;

  1. Nangmah tein Kawlram tanzung ah tthohkhansa na laak a
    hau lai.
  2. Cun Malaysia immigration zungpi ah nangmah tein an ram
    chungin na chuah than khawhnak ding ca (Special Pass) na
    laak hrimhrim a hau lai, na kutpi na nam a hau lai, cun
    cuhlan i Malaysia ram chungah phungning loin na rak um
    man dantatnak vialte nan liam dih rih lai.
    (Na dihmi phaisa, zung nih bawmh a um lai lo).

Mahhi thil pahnih na tuah khawh lawngah IOM nih vanlawng man te cu an in bawmh khawh men. Cu hmanh ahcun bawmh awktlak na si le si lo UN nih biahalnak an in tuah lai..Cu hnu ah IOM zong nih Biahalnak an in tuah ve lai… Caan sau a rak lai.
Cun 2013 ah zung lut a simi hna cu Vawlei cung ralzam dirhmun/sinak ah cohlan nan si rih lo caah bawmhnak pek ding hmanh in an in cohlang men hna lai lo…

Mahhi riantuannak hi IOM nih timhtuahnak nganpi he kum 2016, Thailand ram ah an rak thok bal cang nain an hlawh a rak tling lo… Zeicatiah, Kawlram cozah, Tanzung le nawlngeitu ramchung cozah immigration hna sinah chimrelpiaknak asiloah nawlnak tthohkhansa an tuah lo caah a si.

Atu zongah UN nih Laimi tlunnak sok uh kan in bawmh hna lai tiah an aupi len nain, bawmhalmi a mikip paoh in an cohlang hna lo. Laimi hi an tlung duh tak hnga maw timi theih duhnak caah rap an kan tarhmi tu a si rua tiah purhdah khawh tu an si deuh. Zeicatiah, atu lio Malaysia UN cu Laimi caah zawng zir in an zir i chiandeih hro in an i hrocerter lio caan a si.

Zung nih timhlamhnak an ngeimi le an i ruahchanmi, a cung i Laimi minung 20 kan langhtermi hna khi tluang tein Kawlram an tlun khawh ko a si ahcun a dang a tangmi minung thong 20 leng zong nih an sok te lai i riantuan awk kum 2 ca paoh cu kan ngei te lai tiah kheng chung sa bantuk in an kan bawh hih…

Kawlram kir kan i sum khawh lo tuk hmanh ah, Zung ah bawmnak hal lo tein kan tlun khawh ahcun dignity a um deuh, Malaysia in Kawlram tiang vanlawng man khi a tampi zong a dihmi a si lem loh… Ngeih lo tuk hrat tu ahcun Community/Krihfabu hna nih UN ral doh chung paoh hi cu i bawm kho chung usihlaw a tha ngai hnga ka ti…

Tangti hna usih,
Ka Lawm
Lian Cenhrang

Be the first to comment

Leave a Reply

Your email address will not be published.


*