Kawlram hlasa minthang le sibawi a simi Phyo Pyae Sone le a hawile 2 cu Ketamine ritsii tlang 10 he palek nih an tlaih hna i Bahan peng biaceih zung ah Upadi Dal 19(a)/21 in taza an cuai hna.
Taza an cuai hnanak Upadi cu kum 10 in rikhiah ngeilo tiang thongthlak khawhmi a si tiah Bahan peng biaceih bawi U Saw Tun Aye nih a chim.
“Phyo Pyae Sone, Chan Nyein Ko le Roney San Lwin cu October 7 in 21 tiang palek sakhan ah hren an si lai. Biaceih zung kan sual ko tiin an i phuan ahcun kum 10 in rikhiah ngeilo tiang thong an tla kho,” tiah U Saw Tun Aye nih a chimchap.
Nizaan October 7 ahkhan ritsii thawngpang an theih ruangah rithaisii dotu palek 40 nih Myanmar Plaza ah a ummi Gloria Jeans Coffee dawr ah tlaihkhihnak an tuah. Mah ahcun, Phyo Pyae Sone motor chung i bag chungah Ketamine timi ritsii tlang 10 an hmuh.
“Phyo Pyae Sone motor hnulei an check i Ketamine ritsii (0.4g) tlang 10, Phyo Pyae Sone hmetpungtin le Iphone 1 an hmuh.”
“Chan Nyein Ko kut cungah Iphone 1 le Roney San Lwin kut cung ah Iphone 1 an hmuh fawn. Mah in khan an 3 in rithaisii upadi in taza an cuai hna,” tiah U Saw Tun Aye nih a chim.
“Ritsii tlang pawl cu Thailand ram ah ka cawkmi a si” tiah Phyo Pyae Sone nih palek sin ah a chim.
