Kawl Ralkap ruangah Karen ralzaam 100,000 leng an si cang

Karen state chungah mipi ting 1 (100,000) leng nih an inn le khua chuahtak in ralzaam dirhmun in an um cang.

Karen state chung i Karen hriamtlai phu KNU nih an ukmi hmun pawl ah Kawl Ralkap he kahdohnak a fah caah mipi ting 1 leng rawl ei awk reprai ngei loin ramtang le pawngkam khua pawl ah ralzaam dirhmun in an um cang, tiah Karen nuhrin covo bu KHRG nih a thanh.

KNU ralkap hi phu/brigades 7 in an i ṭhen. Ralkap phu 5nk an umnak hmun Hpapun peng ahhin ralzaam 70,000 hrawng leng an um cang.

KNU ralkap phu 7 an umnak peng pawl ahcun Kawl Ralkap le KNU an i kah lengmang caah khuate tampi an khua ah um ngam ti loin ramtang ah an zaam, i thup hna. Mah ruangah Karen state chung ralzaam dihlak hi ting 1 leng an si cang, tiah KHRG nih a thanh.

KNU ukmi hmun pawl ahcun ni fatin ngawt in kahdohnak a um peng. Nyaung Lay Pin peng le Kyaukkyi peng ah ralzaam 800 hrawng an um. Dawei peng peng ah 1,000 leng. Mutaw pengah ralzaam 9,000 hrawng an um.

KNU ralkap phu 1nk an umnak Thaton peng zongah khuate tampi in minung tampi an zaam cuahmah. Kawl Ralkap nih hramhram in porter an suai hna i KNU meithal kuan in i khamnak phaw caah an hman hna.

Kum 2012 ahkhan KNU cu Myanmar cozah he i kah ti lo dingin minsen an thut. 2015 zongah Rampumpi Kahngolnak Cahren (NCA) ah minsen an thut.

Nain, KNU ralkap phu 5nak hmunhma ahcun NCA minsen an thutka zongah an i kap pah lengmang. An 2 ningin ‘nanmah nih NCA sachoh nan buar’ tiah an rak i puh veve tawn.

Kawl Ralkap nih uknak a fir hnu ah CDM a tuahmi pawl cu KNU nih raltuk tintan a pek hna caah Kawl Ralkap nih fak piin KNU cu a doh peng.

Kawl Ralkap hrem uknak kan donghter lai tiin hriamnam a tlaimi PDF minung tampi zong KNU sinah an i dor.

Atu hi Kawl Ralkap 3,000 leng cu raltuknak tank le motor a zaza in Sagaing le Magway ramthen in Chin ram lei ah an hung kai cuahmah. CNF sakhan le Chin ram pumpi lak dingin a rami an si. A ra laimi ni tlawmpal chungah Laitlang ah ral a fak kho men. Chin mipi tam taktak harnak kan tong kho, ahlei in CNF sakhan umnak Thantlang peng mipi lungvar tein um cio kan herh.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...