Australia pa Sean Turnell cu biaceihzung ah hohmanh nih holh lehpiak hna hlah seh tiin nizaan ah Naypyitaw biaceihzung nih bia a chah.
Sean Turnell cu sipuaizi kongah Aung San Suu Kyi acozah ruahnak petu asi. Min Aung Hlaing le a tapeh pawl nih February 1 ah uknak an fir lio ahkhan an tlaih ve.
Aung Sang Suu Kyi le a ṭuan hawi minung 3 he biaceihzung ah an chuahpi hna. Taza an cuainak hna upadi aa khat.
Cozah thlithup upadi nan buar tiin taza an cuai hna. A tambik kum 14 tiang thongthlak khawhnak upadi asi. Mah upadi cu Mirang nih Kawlram an uk lio ah an rak sermi si i “ral caah santlaimi cozah konglam record le phuan ahcun kum 14 tiang thongthlak ding’ timi asi.
Nizaan ah Suu Kyi, Sean Turnell le an rianṭuan hawi 3 (dihlak 5) cu Naypyitaw biaceihzung ah kutka kharkhumh in bia an ceih hna lio ah hohmanh nih holh leh piak lo dingin bia an chah hi si, tiah Sean Turnell a sihni Ye Lin Aung nih a chim. Bia an ceih hna lio cu mipi le media zong an luhter hna lo.
Taza cuaitu ralkap tapeh nih “hohmanh nih holh leh piak hna hlah seh” tiin biaceihzung a hal i biaceihtu nih a lungtlinpi, tiah Ye Lin Aung nih a chim.
Sean Turnell le an rianṭuan hawi pawl Kawl Ralkap nih taza an cuainak hna aruang hi a dikthlir in hngalh asi lo. Kawl Ralkap nih a dikthlir a chim duh lo.
Kawl ralkap ukmi Myawaddy le MRTV nih cun, “Australia pa Sean Turnell nih cozah tangka le sipuaizi thlithup a hngalh dih pinah zaam aa tim….,” tiin an rak thanh.
Ye Lin Aung nih, “Turnell hi biaceihzung ah holh an leh piak lo ahcun kan caah a har ngai. Australia Tanzung rianṭuan pawl he kan i ceih a hau lai.
“Turnell cu Naypyitaw thong ah an thlak. A ngandam mi cu a lo ko. Eidin le carel awk ka kua uh a kan ti,” tiah a chim.
Suu Kyi le a rianṭuan hawi pawl hitin ralkap nih taza an cuaimi hna hi an sual taktak si leem loin, Suu Kyi hi ramkhel tuah kho ti hlah seh tiin ṭawncop case in an cuaimi hna asi, tiah mi tampi nih an zumh.
