Myanmar ralkap zinan a phormi motor 2 cu tu zaanlei 1pm hrawngah Karen/Kayin state i Myawaddy le Kawkareik khua kar highway lam cungah meithal in an kah.

Motor pakhat cu a puak kaang viar. Motor 2 mongtu 2 an thi.

A hmun ah mi bawmh aa thawhmi pakhat nih, “Myawaddy khua in Kawkareik hua lei ah a kalmi zinan phor motor 3 lakah 2 an kah hna. Tu zaanlei 1pm hrawngah Myawaddy-Kawkareik lam (Asia Lam) cungah an kah hna,” tiah a chim.

“Motor pakhat cu a kaang i a mongtu zong a kangh thah chih. Adang pakhat an kahmi zong cu a mongtu an khen thah ve,” ati.

Myawaddy khua in motor an kahnak hmun ah meithah aa thawhmi meithat motor pakhat zong a hmun phak ah an kah ve i a hmeilei thlalang kuai, tiah Myawaddy Meithat Zung bawi nih a chim.

Myawaddy – Kawkareik Asia Lam ahhin tutan he cun zarh khat chungah zinan phor motor voi 4 bak an kah cang. Zinan phor motor 2 an kaang cang i a mongtu 3 an thi cang.

KNU nih, “Zinan telh in ralhrang tangka luhnak sipuaizi zeihmanh tuah hlah uh…,” tiin Karen state chung company vialte thawng a rak thanh lengmang cang hna.