Hakha um Bethel Baptist Church ah pastor a ṭuan liomi le Chin Association for Christian Communication (CACC) ah Chairman a ṭuan liomi Rev. Za Mang, kum 57 nih tu zingka 4am ah COVID-19 in a kan liamtak.
A nupi le an fale 4 a rohtak hna.
Rev. Za Mang cu Thantlang peng, Aibur khuami asi. Kum 2010 in 2012 tiang Zophei Christian Fellowship (ZPCF), Malaysia ah pastor a rak ṭuan.
ZPCF le Zophei tefa dihlak nih kan cohan lawng si loin, Chinmi caah asi khawh tawk in rian a ṭuan cuahmah liomi asi.
“A damlo ti thawng kan theih bakin thla kan campiak peng ve. Nain a liannganbikmi Pathian nih Amah sin dinh cu a rem deuh ati caah, taksa minung nih kan sian lo tuk buin a sertu sinah a kan dinhtak,” tiah ZPCF nih ngaihchaitnak thawng a thanh.
“Rev. Za Mang kan tlaihchannak, kan bochannak le ZPCF a rak dawtnak kong cu ZPCF nih chim kan dai lai lo.
“Kan pa Rev. Za Mang nih a tantakmi a nupi, fale dihlak, cingla rualchan, Aibur khuami le Bethel Baptist Khrihfabu (Hakha) member nan dihlak sinah Zophei Christian Fellowship nih a THUKBIK NGAIHCHIAT HRAWMNAK cakuat kan in chanh hna. Kan ngaihchiatnak Jehovah Pathian nih a bia in kan hnem cio hram seh,” ati.
Rev. Za Mang konglam tawi
Rev. Za Mang cu kum 1965 November 2 ah Thantlang peng, Aibur khua ah Pu Rung Mang le Pi Ngun Par nih an ngeihmi fapa rosung asi.
1996 January 6 ah Aibur khaumi Rev. Thang Cung le Pi Pen Zing hna i an fanu Biak Men he an i um. Pathian nih fapa 3 le fanu 1 a pek hna.
Sianginn kainak
1984 ah Hakha No. 1 sianginn in Tang 10 a awng. 1992 ah Mandalay University in B.Sc a dih. 1997 ah Myanmar Institute of Theology (MIT) in B.D a dih. 2006 ah Hongkong Baptist Theologicaal Seminary in M.Th a dih.
Rianṭuannak
1997 in 2010 tiang Chin Christian University, Hakha ah caantling in cachim rian (lecturer) a ṭuan.
2010 in 2012 tiang Zophei Christian Fellowship, Malaysia ah Senior Pastor rian a ṭuan.
2013 in 2019 tiang Bethel Baptist Church, Hakha ah pastor rian a ṭuan.
2020 in atutiang Bethel Baptist Church, Hakha ah Senior Pastor rian a ṭuan.
Chin Association for Christian Communication (CACC) zongah Chairman a ṭuan liomi asi.
Tuar thiam a har ko: Pastor 3 nih Bethel Baptist Church (Hakha) an liamtak
2021 April 5 ah Rev. Dr. Bei Rona (B.Th’ B.A’ M.Div’ D.Miss) nih Bethel Baptist Church le member vialte a liamtak hna.
August 3 ah Rev. Ram Hei (B.Th’ M.Div) nih a liamtak ve hna.
Tuni August 26 ah Rev. Za Mang (B.Sc’ B.D’ M.Th) nih a liamtak ve hna.
Hakha Baptist Association (HBA) ah Associate General Secretary a ṭuan liomi Saya Ceusang Kung nih, “Thla 5 chungah ordained pastor 3 bak nih khrihfabu pakhat liamtak hi vawlei tuanbia ah a um bal in kan thei bal lai ka zum lo,” tiah a ngaihchiatnak kong a chim.
“Hmai lei zongah thei ti hlah usih tiah thlaza ka cam. An cawnmi hi thihtak dingah a pam tuk rih e. Bawipa Bethel Baptist Church hi zeidah na kan duhpiak mi a si ti hi kan thei kho lo e.
“Zumtu zapi hna thla kan campi ulaw Bawipa duhnak hi kan kawlpi cio tuah uh, zei caah tiah vawlei tuanbia ah a um bal lomi tuanbia kan tial cang. Bawipa na mit hmai kan cungah tlanter than ko law tiah kan nawl ko,” ati.
