Kalaymyo, Sanmyo sang ah a ummi B.E.H.S. No. 8 sianginn ah sianginn a kaimi kum 5 ngakchia nute a tlaihhremtu pa i hmanthlak cu an hmuh cang nain atu tiang an tlai kho rih lo.
Mitlaihhrem tu pa nih tangcheu a kai lio kum 5 ngakchia nute a kalpi nak lam pawl zulh in Tahan dawr pawng um bar dawr hmai ah bunhmi CCTV chungah motorcycle in a kalpi lio an hmuh.
“Atu hi ngakchia nute cu biahal awk a ttha cang an ti. Ngakchia nute a tlaihhrem tu pa hmanthlak zong CCTV in kan hmuh cang. Nain, an tlai kho rih lo,” tiah Justice for Women rianttuan pakhat nih a chim.
Tangcheu kai lio ngakchiat nute tlaihhrem tu pa muisam an hmuhnak hi zarh 2 leng si cang nain atu tiang an tlai kho rih lo. Mah konghe pehtlaih in palek nih kherhlainak an tuah lio a si.
Sanmyo sang um B.E.H.S. No. 8 sianginn ah tangcheu kai lio kum 5 nute cu Ocotber 1 ahkhan mipa pakhat nih changreu kan dangh lai a ti i motorcycle in Dowain Chaung thlanmual pawng ah a kalpi i a tlaihhrem,
2019 chung atu tiangah Kalaymyo peng ah tlaihhrem case 19 a um i cu chungah kum tlinglo ngakchia tlaihhrem case 8 aa tel tiah Justice for Women nih a ti.
“Kan cazin ning ahcun 2019 chung ah tlaihhrem case 19 a um. Cu chungah, kum 14 tang ngakchia tlaihhrem case 8 a um. Kum 16 tang tlaihhrem case zong a um, a dang tein kan tthen hna. A kum tling cang nain pum tlamtling lo tlaihhremmi zong an um,” tiah JW chungtel Pi San Nuam nih a chim.
Kum 2019 chung ah a cangmi tlaihhrem case cheukhat cu biacein zung nih bia a khiahpiak cang hna nain cheukhat cu a ceihpiak cuahmah hna lio a si.
“Tlaihhrem tongmi holh thiam lo, hnachet pawl cu kutke in mi chawnhbiak ning an thiam ve lo tikah biaceih zung nih an kong a ceih tik ah a rau khun.”
“October 1 i No.8 sianginn ah KG a kai liomi ngakchia nute a tlaihhremtu zong rianrang in an tlaih khawhnak hnga kan i zuam liopi a si,” tiah Pi San Nuam nih a chim. – Chin World
