Kachin state, Hpakan peng, Nam Hmaw khuate ah rithaisii zuartu 2 le a hmangtu minung 339 cu Kachin rithaisii dotu bu Pat Jasan nih an tlaih hna.
“September 24 zinglei ah kan tlaih hna hi a si i rithaisii zuartu 2 cu Hpakan palek sakhan ah kan kuat hna,” tiah Pat Jasan rianttuan pakhat nih a chim.
Rithaisii zuartu 2 sinah bingrang le lungthawhnak rithaisii tlang 5,400 an tlaih fawn.
Rithaisii a hmangtu 339 cu an tlaih hna ni ah rithaisii a that lonak kong le ngandamnak he aa pehtlaimi chimhcawnpiaknak an ngeih hna hnu ah an thlah tthan hna.
Hika hmun ahhin 2012 in khan rithaisii zuar le cawk a um cang. 2015 ahkhan Pat Jasan nih an rak kal hnawh hna i rithaisii hmang pawl nih hriamnam tiang an rak hman. Atu tan hi Pat Jasan nih avoi 2nk an kal hnawh a si.
Hika hmun hi state le peng cozah rianttuan pawl zong nih voi tampi an kal hnawh lengmang ko nain rithaisii thiang taktak in an tuah kho rih lo.
Rithaisii dotu Pat Jasan bu cu 2014 ahkhan rak dirhmi a si. – RFA
